‘शेयर दिन्छु’ भन्दै ढाटेर पैसा लैजाने लगानीकर्ता अग्रवालसहित तीन जना पक्राउ

काठमाडौँ

‘शेयर दिन्छु’ भन्दै ढाटेर पैसा लैजाने लगानीकर्ता अग्रवालसहित तीन जना पक्राउ परेका छन्

प्रहरीले मोरङ विराटनगर महानगरपालिका ९ स्थायी घर भई हाल काठमाडौँ महानगरपालिका १४ बस्ने ४२ वर्षीय दीपेन्द्र अग्रवालसहित तीन जना शेयर लगानीकर्तालाई पक्राउ गरेको हो ।

धनुषाको जनकपुरधाम उपमहानगरपालिका–१ घर भई हाल काठमाडौँ महानगरपालिका–१० बस्ने ६० वर्षीय दिनेशप्रसाद साहबाट निज दीपेन्द्र अग्रवालसमेतले शेयर दिलाई दिने भन्दै खातामा रु छ करोड ४५ लाख रकम हाल्न लगाई सो रकम फिर्ता नगरेको र शेयर पनि नदिलाएकाले ठगी तथा आपराधिक विश्वासघात गरेको जाहेरीका आधारमा आज पक्राउ गरिएको प्रहरी परिसर काठमाडौँका प्रवक्ता एवं प्रहरी उपरीक्षक अपिलराज बोहराले जानकारी दिएका छन् ।

उनका अनुसार ठगी तथा आपराधिक विश्वासघात मुद्दा शीर्षकमा गत असार ३० गते मुद्दा दर्ता भई काठमाडौँ जिल्ला अदालतबाट यसअघि नै पक्राउ पुर्जी जारी भएको थियो ।