फोटोपत्रकार तथा पर्वतारोही पूर्णिमा श्रेष्ठले गरिन् मनास्लु हिमालको आरोहण स्थगित

१८ असोज ०७९, काठमाडौं । फोटोपत्रकार तथा पर्वतारोही पूर्णिमा श्रेष्ठले मनास्लु हिमालको आरोहण खराव मौसमका कारण स्थगित गरेकी छिन् ।
उनले खराव मौसमका कारण आरोहण स्थगित गर्नु परेको बताएकी छिन् । उनी विना अक्सिजन मनास्लु आरोहणका लागि राम्रो मौसम कुर्दाकुर्दै लामो समय वितेको र त्यो मौसम नआउँदा आरोहण स्थगित गर्नु परेको बताएकी छिन् ।
उनी सहितको टोली सुरक्षित रुपमा आधार शिविर आइसकेको छ । उनको आरोहणका लागि नेपाल लाइफ इन्स्योरेन्स र चौधरी ग्रुपले प्रायोजन गरेको थियो ।
उनले सामाजिक सञ्जालमा लेखेकी छिन्,‘ हार मान्नु यो सिजनको सबैभन्दा राम्रो निर्णय थियो । आखिर, मेरो साथीले भनेजस्तै जीवन यहाँ छ र पहाड अझै छ । मेरो पर्वतारोहण यात्रा जारी रहनेछ।’
उनी दशैं मनाउन परिवारसँग केही दिन गाउँमा रहने र फेरि तयारीमा लाग्ने बताएकी छिन् ।
पर्वतारोहणसँगै उनी लामो समयदेखि नेपाली पत्रकारिता क्षेत्रमा फोटोपत्रकारिता गरिरहेकी छिन् । पछिल्लो समय मनास्लु हिमालमा लगातार पहिरो गएको थियो । पहिलोका कारण ३ दर्जन टेण्टमा क्षति पुगेको थियो भने केही बेपत्ता भएका थिए ।