गायक प्रकाश सपुतको नयाँ गीत ‘सकम्बरी’ विवादमा

महिलाले देह व्यापार गरेको भिडियो गीतमा राखेपछि गीतको विरोध भएको हो

४ बैशाख । चर्चित गायक प्रकाश सपुतको नयाँ गीत ‘सकम्बरी’ विवादमा आएको छ । महिलाले देह व्यापार गरेको भिडियो गीतमा राखेपछि गीतको विरोध भएको हो ।
उनले ल्याएको अघिल्लो ‘पीर’ बोलको गीतमा पनि एक पूर्वमहिला छापामारले जीवन जिउनका लागि देह व्यापार गरेको दृश्य राखेपछि विवादमा आएको थियो । पछि सर्वत्र विवाद भएपछि उनले यो दृश्य हटाउनु परेको थियो ।
विवादका बीच गीतले सोमबार विहानसम्म ४७ लाख ९ हजार दर्शक बटुल्दै नेपालमा नम्बर एक टे«ण्डिङमा आएको छ ।
३ दिनमै यो गीतमा उनले पाएको दर्शकको मायाँ मात्रै होइन गाली पनि हो । सामाजिक सञ्जाल टिकटक र फेसबुकलगायतमा जहाँ त्यही उनको भिडियो फुटेज र विरोधको शव्द लेखिएका भेटिन थालेको छ ।
भिडियोमा यस्ता दृश्य कलात्मक र साँकेतिक रुपमा राख्नु पर्नेमा त्यसो गरिएको छैन । दृश्य ठाडो र भद्दा छन् । कला क्षेत्रमा लाग्न देह व्यापार गर्नुपर्ने बाध्यता गीतमा समेटिएको छ ।
पछिल्लो समय गीतमार्फत सपुत विकृती विरुद्ध चर्को स्वरमा विरोधको विषय उठान गरिरहेका छन् । तर उनी आफै विरोधको शिकार बनिरहेका छन् । तर उनी व्यावसायिक रुपमा सफल पनि छन् ।
उनीविरुद्ध नकारात्मक सन्देश प्रवाह गरेको आँशु र भावनाको व्यापार गरेको आरोप लाग्ने गरेको छ ।
उनको शव्द संगीतको भने संगीत पारखीहरुले मुक्तकण्ठले प्रशंशा गरिरहेका छन् ।
अघिल्लो गीत ‘पीर’ करिव १ करोड भ्युज आएपछि युट्युवबाट हटाएका थिए । अधिकारवादीको विरोधको स्वर फेरि घन्किए यो गीत पनि हटाउनु पर्ने बाध्यता पर्न सक्छ ।
एक पल्ट विवादमा आएको सोही विषय पुनः उठाएर गल्ती गरेको उनको प्रशंशकहरुले टिप्पणी गर्न थालेका छन् ।