वायु प्रदूषणको मात्रा उच्च तहमा, घर बाहिर ननिस्कन सरकारको आग्रह

२१ पुस, ०७७ ललितपुर । सरकारले काठमाडौं उपत्यकासहित विभिन्न सहरमा वायु प्रदूषण घातक तहमा पुगेको भन्दै सकभर घरबाहिर ननिस्कन आग्रह गरेको छ । वातावरण विभागले मंगलबार एक सूचना निकालेर बालबालिका वृद्धवृद्धा, दम, खोकी, श्वासप्रश्वासलगायतका समस्या भएका व्यक्तिलाई घरबाहिर ननिस्कन आग्रह गरेको हो । अरू व्यक्ति घरबाहिर निस्कँदा अनिवार्य मास्क लगाउन विभागको सुझाव छ ।

काठमाडौं उपत्यकाबाहेक तराई क्षेत्रका शहरहरू जस्तै, नेपालगञ्ज, विराटनगरमा पनि वायु प्रदूषणको मात्रा उच्च भएको पाइएकोले त्यहाँका नागरिकहरूलाई पनि विशेष सावधानी अपनाउन अनुरोध गरेको छ । साथै फोहोर बाल्दा र आगो बाल्दासमेत वायु प्रदूषण झनै बढ्ने भएकाले यस्तो कार्य नगर्न पनि विभागले आह्वान गरेको छ ।