पुल्चोकको समय फल्चा निर्माण पसललाई बाधा परेको मुद्दा परेपछि रोकियो 

३१ भदौ ०६८, ललितपुर । ललितपुरको पुल्चोकस्थित श्री लालीगुराँस सहकारी अगाडि निर्माणाधिन समय फल्चाको पुनर्निर्माण रोकिएको छ । अदालत पाटनले अन्तरकालीन अन्तरिम आदेश दिँदै निर्माण रोकेको हो ।
निर्माणस्थलसँगै रहेको लालीगुराँस सहकारी भवनमा रहेका पसलमा व्यापार गर्ने व्यक्तिले आफूलाई असर परेको भन्दै मुद्दा दायर परेपछि अदालतले अन्तरकालीन अन्तरिम आदेश दिएपछि निर्माण कार्य रोक्नु परेको महानगरपालिकाले जानकारी दिएको छ ।
महानगरका मेयर चिरिबाबु महर्जनले यो फल्चा अदालतको आदेश अनुसार नै निर्माण गरिरहेको बताएका छन् । तर लाली गुराँस सहकारीले अदालतले नियमानुसार गर्नु भन्ने आदेश दिएकोले नियममा यो ठाँउ सडक मापदण्डभित्र पर्ने दावी गर्दै आएको छ ।
श्री लालीगुराँस सहकारीका प्रमुख कार्यकारी अधिकृत सुरेन्द्र भण्डारीले ११ मिटर सडक मापदण्डभित्र रहेको बताए ।

गत भदौ १ गते जिल्ला अदालत, ललितपुरले फल्चा निर्माण रोक्न ‘अन्तरकालीन आदेश’ दिएको थियो । तर अदालतले गत असार २३ गते अन्तरकालीन आदेश खारेज गरेपछि महानगरले शिलान्याश गरेर फल्चा निर्माण सुरु गरेको थियो ।
फल्चा निर्माण सुरु भएपछि लाली गुराँस डेरीको काउण्टर र कार्पेट पसलको बाटो थुनिएको थियो । यद्यपी बाटो थुनिए पनि पसल भने खुल्लै राखिएको देख्न सकिन्थ्यो ।
यो फल्चा २०६ वर्ष पुरानो ऐतिहासिक सम्पदा रहेको स्थानीय बासिन्दा बताउछन् । यहाँ मच्छिन्द्रनाथको रथ तान्ने बेलामा समयबजी खाने गरिएको स्थानीयहरुको भनाई छ ।
तर पछिल्लो समय यो ठाँउ फुटपाथको रुपमा प्रयोग हुँदै आएको थियो । पुल्चोकजस्तो व्यस्त सडकमा फल्चा निर्माणपछि लगभग ५  फुटको फुटपाथ मात्रै बचेको छ ।
फल्चा निर्माणपछि एकातिर फुटपाथ साँघुरो भएको भन्दै स्थानीयबासीले दुखेसो पोखेका छन् भने अर्कोतर्फ ऐतिहासिक फल्चा जसरी पनि बनाउने अभियान स्थानीयले चलाएका छन् ।