प्रधानन्यायाधीशले भने, ‘मन्त्रिपरिषदमा मेरो पनि भाग लागेको कुरा सत्य होइन’

१८ असोज ०७८,काठमाडौं । मन्त्रिमण्डल विस्तारमा प्रधानन्यायाधीश राणाले पनि भागबण्डा मागेको समाचार सार्वजनिक भएसँगै सर्वोच्च बारका पदाधिकारीले प्रधानन्यायधीशलाई भेटेका छन् ।
सोमबार विहान सर्वोच्च बारका अध्यक्ष पूर्णमान शाक्य, सचिव ऋषिराम घिमिरे, सदस्य विकास भट्टराई लगायतको टोलीले प्रधानन्यायाधीश प्रधानन्यायाधीश चोलेन्द्र शम्शेर जबरालाई भेट्न पुगेको हो ।
छलफलमा कोटा मागेको, संवैधानिक इजलास लगायतका विषयमा छलफल हुने सर्वोच्च बारका एक पदाधिकारीले जानकारी दिए। यसअघि पनि संवैधानिक इजलास गठनमा प्रधानन्यायधिश राणाले सहमति पालना नगरेको भन्दै पदाधिकारीहरु रुष्ट छन् । भेटको क्रममा प्रधानन्यायाधीश जबराले सरकारसँग आफूले कोटा मागेको कुरा पूर्णतया झुटो रहेको दावी गरे ।

सोमबार सर्वोच्च बारका पदाधिकारीहरूसँगको भेटमा उनले यस्ता हल्लामा कुनै सत्यता नरहेको बताए । प्रधानन्यायाधीश राणाले सरकारमा कोटा मागेको चर्चा चलेपछि सर्वोच्च बारका अध्यक्ष पूर्णमान शाक्यसहितका पदाधिकारी प्रधानन्यायाधीशसँग छलफल गर्न पुगेका थिए । छलफलमा सर्वोच्च बारका पदाधिकारीले प्रधानन्यायाधीश समक्ष सरकारसँग कोटा माग गरिएको विषय प्रकाशमा आएको भन्दै प्रष्ट पार्न आग्रह गरेका थिए । जवाफमा प्रधानन्यायाधीश राणाले आफूले त्यसप्रकारको कुनै कुरा नगरेको प्रस्ट पार्दै यस विषयमा सर्वोच्च अदालतले नै चाँडै विज्ञप्तिमार्फत खण्डन गर्न लागेको जानकारी दिएको सर्वोच्च बारका एक पदाधिकारीले बताए ।