काठमाडौंको ठमेल र ललितपुरको भैसेपाटीमा चोरी

३ पुस ०७८, काठमाडौं । काठमाडौंको ठमेल र ललितपुरको भैसेपाटीमा चोरी भएको छ ।
प्रहरीका अनुसार काठमाडौं महानगरपालिका २६ ठमेल अशोक गल्लीस्थित होटल फेमीली होममा एक महिनादेखि बस्दै आएका पाकिस्तानी नागरिक २८ वर्षीय महमद ईशाको कोठामा विभिन्न सरसामान चोरी भएको हो । उनको कोठाबाट सुटकेशमा रहेको सुनको सिक्री, नेपाली रुपैयाँ, यूएइ दिराम, अमेरिकी डलर समेत गरी करिब १६ लाख ३ हजार नेपाली रुपैयाँ बराबरको धनमाल शुक्रबार साँझ चोरी भएको छ ।
साथै ललितपुरस्थित ललितपुर महानगरपालिका १८ भैंसेपाटी बस्ने ४४ वर्षीय रञ्जना भण्डारीको घरबाट सुनचाँदी एवं हिराको विभिन्न गरगहना तथा नगद समेत गरी करिब ९ लाख ९७ हजार रुपैयाँ बराबरको धनमाल शुक्रबार चोरी भएको छ ।
दुवै घटनामा संलग्न अहिले फरार रहेका व्यक्तिहरूको खोजी गर्नुका साथै यस सम्बन्धमा प्रहरीले आवश्यक अनुसन्धान गरिरहेको जानकारी दिएको छ ।