ललितपुरको आश्राङ हेल्थ पोष्टकी बर्खास्त अनमी विमलाले बचाइन् बिरामीको ज्यान

ललितपुर खबर
२२ साउन ०७९, ललितपुर । केही दिनअघि दक्षिण ललितपुरको वागमती गाँउपालिकाको अपमानपुर्ण बर्खास्तमा परेकी वर्थिङ नर्स विमला सञ्जेलले हेल्थ पोष्टका कर्मचारीको आग्रह र विरामीको आफन्तको हारगुहारपछि मृत्युको मुखमा पुगेकी एक विरामीको ज्यान बचाएकी छन् ।
वागमती ६ आश्राङकी सुत्केरी सविना सिगार केही दिनअघि घरमै सुत्केरी भइन् । तर लामो समयसम्म पनि सालनाल नझरेपछि उनलाई स्टेचरमा बोकेर आश्राङ हेल्प पोष्ट ल्याइयो ।
हेल्थ पोष्ट ल्याइए पनि बर्थिङ अनमी विमला सञ्जेललाई गाँउपालिकाले करारको कर्मचारी भन्दै बर्खास्त गरेका कारण सिंगारको उपचार हुन सकेन ।

हेल्थ पोष्टकी इन्चार्ज गितादेवि दाहाल आफू कोरोना लागेको कारण हेल्थ पोष्टमा काम गर्न नगएको बताइन् । उनले फोनमा भनिन्, ‘मलाई धेरै गाह्रो छ । हेल्थपोष्टका बारेमा केही थाहा छैन ।’
बर्खास्तमा परेकी विमला सञ्जेलको सहयोग नभएको भए सिंगारको ज्यानै जाने खतरा रहेको विरामी बोकेर ल्याउने स्थानीय गणेश लोले बताए । उनले भने,‘लामो समयदेखि पिसाप बन्द थियो । नजिकै सडक बन्द रहेका कारण एम्बुलेन्स आउन सम्भव थिएन ।’
उनका अनुसार एक घण्टा टाढाबाट हेल्थ पोष्टसम्म स्टेचरमा बोकेर विरामी ल्याउनु पर्ने अवस्था थियो । अस्पतालबाट सडकसम्म बोकेर लैजान पनि समय लाग्ने र पहाडको बाटो एम्बुलेन्स आउन समस्या छ । २ घण्टा टाढा वागमती ४ प्युटारमा थाङ्सिङटार अस्पताल भए पनि गम्भिर प्रकृतीका विरामी समयमै लैजान समस्या छ । गाँउपालिकाले उपलव्ध गराउने निशुल्क एम्बुलेन्स पहाडको बाटो भत्किरहने कारण ल्याउन अप्ठ्यारो छ । पहाडको टाढा टाढाको बाटो पार गरेर एम्बुलेन्स आइपुग्दा विरामीको ज्यानै जाने खतरा हुन्छ ।
निलम्बनमा परेकी बर्थिङ नर्स विमला सञ्जेलले मानवताका आधारमा गाँउपालिकाले बर्खास्त गरेकै हेल्थपोष्टमा गएर विरामीको उपचार गरेको बताइन् । उनले भनिन्,‘मेरै घर नजिक हेल्थ पोष्ट छ । म यही बस्छु । तर गाँउपालिकाले करारको कर्मचारी भन्दै बखास्त गरि दियो । मलाई तलव प्रदेशले दिन्थ्यो । गाँउपालिकाले आफ्नो मान्छे भर्ना गर्न मलाई होइन यो सिंगो समाजलाई अन्याय गरेको छ ।’
गाँउपालिका ६ का वडाध्यक्ष नारायण बोम्जन प्रदेशबाट आएको बजेट गाँउपालिकाका लागि आएको र आश्राङ हेल्थ पोष्टकै लागि भनेर नतोकेको बताउछन् । उनी भन्छन्,विमला सञ्जेल नै हेल्थ पोष्टका लागि चाहिने भन्ने होइन हामी विकल्प खोज्न सक्छौं । हेल्थ पोष्टमा इन्चार्ज नै उपचार गर्न सक्षम छन् । राजा मरेर राज्य अड्कदैन ।

तर बर्खास्तमा परकी कर्मचारी विमला सञ्जेल भने १३ वर्षदेखि नेपाल सरकारले तालिम दिएर आफूलाई निपूर्ण बनाएको र सरकारले लगानी गरेको बताउछिन् । उनी भन्छिन्, ‘सक्षम र तालिम प्राप्त कर्मचारी यो दुर्गममा आएर बस्न चाहदैनन् । बसे पनि धेरै विदा बस्छन् । गाँउमा उपचारको लागि समस्या हुन्छ । साह्रो गाह्रो पर्दा म चौविसै घण्टा उपलव्ध हुन्थे ।’
एक स्थानीयले राजनीतिकरणका कारण विवलालाई गाँउपालिकाले बखास्त गरेको र बर्खास्त भएपछि उपचारमा समस्या परेको बताए । गत साउन १ गतेबाट उनीसहित १३ जना करारका कर्मचारीलाई गाँउपालिकाले बर्खास्त गरेको थियो । देशै भरि स्थानीय सरकार परिवर्तन भएपछि राजनीतिक आश्थाका कारण धेरै कर्मचारीहरु बर्खास्तमा परेका छन् ।
गाउपालिका अध्यक्ष विरबहादुर लोप्चन अस्पतालको समस्याबारे बुझन खोज्दा सम्पर्कमा आउन चाहेनन् ।