दक्षिण ललितपुरका भूमिहिनका लागि फेरि फारम खुला, लालपूर्जा वितरणका लागि धेरै काम बाँकी

६ भदौं ०७९, ललितपुर । दक्षिण ललितपुरका भूमिहीनका लागि पुनः फारम खुला भएको छ ।
राष्ट्रिय भुमि आयोग ललितपुरले सूचना प्रकाशित गरेर भूमिहीन बासिन्दाहरुलाई फारम भर्न छुटेको भए फेरि फारम भर्न आह्वान गरेको हो । आयोगले गोदावरी नगरपालिका, बागमति गाउँपालिका, कोन्ज्योसोम गाउँपालिका र महाँकाल गाउँपालिकाका लागि सूचना प्रकाशित गरेको हो ।
गोरखापत्र दैनिकमा ३५ दिने सुचना प्रकाशित गरे लगत्तै लगत संकलनको सुरु भएको हो ।
भुमिहिन दलित, भुमिहिन सुकुम्बासी र अव्यबस्थित बसोवासीले आफ्नो वडामा गएर फर्म भर्न सक्ने भुमि आयोग जिल्ला समिति ललितपुरका अध्यक्ष श्रीगोबिन्द महर्जनले बताए ।
भुमिहिन सुकुम्बासी र अव्यबस्थित बसोवासीहरुले आफुलाई कुनै प्रकृया थाहा नभए आफ्नो वडा कार्यालय वा राष्ट्रिय भुमि आयोग ललितपुुरको कार्यालयबाट जानकारी पाउन सकिने आयोगका अध्यक्ष महर्जनले जानकारी दिए ।
भुमि आयोग ललितपुरको कार्यालय जिल्ला समन्वय समितिको कार्यालयमा रहेको छ ।
जिल्ला अध्यक्ष महर्जनले प्रकृया धेरै भए पनि काम खासै नभएको बताए ।
उनका अनुसार फारम भरेपछि उनीहरु भूमिहीन भएको नभएकोे विषयमा सत्यतथ्य जाँच गरेर वडाले नगरपालिकामा पठाउनु पर्नेछ । नगरपालिकाले पनि तथ्य जाँच गरेर जिल्लामा पठाउने र जिल्लाले सदर गरेर नापी खटाउनेछ । त्यसपछि मात्रै लालपूर्जा वितरण हुन्छ ।
दक्षिण ललितपुरका चार वटा पालिकामा सम्झौंता भए पनि खासै काम नभएको उनले बताए । उनका अनुसार महालक्ष्मी र ललितपुर महानगरसँग भूमि आयोगसँग काम सुरु गर्न सम्झौता नै भएको छैन ।