ठेचोमा बाह्र बर्षे जात्राको भोजको लागि घर भत्काउन खोज्दा लफडा, घरधनी घाइते

२४ असोज ०७९ , ललितपुर । ललितपुरको ठेचोस्थित नवदुर्गा भवानीको बाह्र बर्षे जात्रा अन्र्तगत देश भोज लागि स्थानीयबासीको घर भत्काउने क्रममा लफडा भएको छ । ठेचोस्थित लाल सिंतानको घर स्थानीयले भत्काउन खोज्दा उनले अवरोध गर्दा उनीमाथि कुटपिट भएको पारिवारिक श्रोतले जानकारी दिएको छ ।
उनलाई एक स्थानीयले घाइते अवस्थामा देखेपछि एम्बुलेन्स बोलाएर पाटन अस्पताल लगेका थिए । उनी बेहोस अवस्थामा अस्पताल पुगेको र अहिले होस खुलिसकेको छ । यसै क्रममा घरअगाडिको बार भने उनीहरुले भत्काएका थिए ।
घाइते सिंतानको घरमा अन्य सदस्य कोही थिएनन् ।
उनकी श्रीमती देश बाहिर छिन् भने आमा महाकाल गाँउपालिकाको कालेश्वरस्थित घरमै बस्छिन् ।
आज नवदुर्गा भवानीको गुठीयारले परम्परादेखि हरेक बाहै बर्षमा भोज खाने गरेको भन्दै स्थानीयको पर्खाल, टहरा र गोठ भत्काएर भोज स्थल निर्माण गरेका थिए । यसै क्रममा डोजर आएर दुरीखेलदेखि करिव ५ सय मिटरसम्मका संरचना खाली गरेको थियो ।
जात्राका क्रममा भोज खाने ठाँउमै अवरोध हुने गरी बनाएको भन्दै स्थानीयहरु आक्रोसित थिए । उनको घरमा ३५ दिनअघि नै सूचना टाँसिएको थियो । तर उनी सहितका ३ वटा घरवालाहरु अदातलबाट घर नभत्काउन स्टेअर्डर ल्याएका थिए ।

घटना लगत्तै प्रहरीको बाक्लो उपस्थिती थियो ।