राष्ट्रिय स्वतन्त्र पार्टीको समानुपातिक सांसद चयनमा असन्तुष्टि

२२ मङ्सिर ०७९ काठमाडौं । राष्ट्रिय स्वतन्त्र पार्टीमा समानुपातिक सांसदका लागि चलखेल शुरु भएको छ । रास्वपाको समानुपातिक सांसद छनोट प्रक्रियामा चलखेल भएको भन्दै समानुपातिक सूचीमा रहेका केही उम्मेदवारले असन्तुष्टि व्यक्त गरेका छन् ।

खस आर्य कोटाबाट समानुपातिक सूचिमा नाम रहेकी निशा डाँगीले आफ्नो फेसबुकमार्फत खबरदारीका लागि आह्वान गरेकी हुन् । रास्वपाले प्रत्यक्षतर्फ ७ सिट जितेको छ भने समानुपातिकमा १३ सिट जितेको छ । उसले सदर मतको १० प्रतिशत कटाएकोले सबै क्लस्टरअनुसार सांसद पठाउनुपर्ने हुन्छ । राष्ट्रिय स्वतन्त्र पार्टीले सात जना महिला सांसद पठाउनुपर्छ । जसमध्ये २ जना प्रत्यक्षतर्फबाट जितेका छन् । अब समानुपातिकबाट ५ जना महिला पठाउनुपर्ने हुन्छ । खसआर्यबाट ४ जना, आदिवासी जनजातिबाट ३, दलितबाट २, मधेशीबाट २, थारूबाट १, मुश्लिमबाट १ जना पठाउनुपर्ने हुन्छ ।