वागमतीका अध्यक्ष लोप्चनले गरे शिक्षक सरुवा,संगठनको विरोध

ललितपुर खबर
२६ मंसिर ०७९, ललितपुर । दक्षिण ललितपुरको वागमती गाँउपालिका अध्यक्ष विरबहादुर लोप्चनले पालिकाभित्र कार्यरत ११ जना शिक्षकहरुको सरुवा गरेपछि पालिकाका शिक्षकहरु असन्तुष्ट बनेका छन् ।
राजनीतिक आस्थाका आधारमा शिक्षकहरुलाई घरपायक पर्ने ठाँउभन्दा टाढा सरुवा गरेको भन्दै शिक्षक संगठन वागमतीको टोलीले पालिका अध्यक्ष लोप्चनसामु ज्ञापन पत्र बुझाए पनि अहिलेसम्म उनले बेवास्ता गरेका छन् ।
वागमती गाँउपालिका शिक्षक संगठनका अध्यक्ष वावुलाल घलान गाँउपालिकाका अध्यक्ष लोप्चनले शिक्षकहरुको सरुवा गर्न ऐनले नदिएको बताउछन् । उनी भन्छन्,‘स्थानीय निकायको अधिनमा पालिकाका विद्यालय रहने भए पनि अहिलेसम्म ऐन बनेको छैन । यो गैरकानूनी हो ।’
संगठनका पालिका सचिव थलप्रसाद सापकोटा शिक्षकहरुले कुनै गल्ति गरेको भए स्प्रष्टिकरण दिएर सुध्रने मौका दिनु पर्नेमा त्यसो नभएको बताउछन् । उनी भन्छन्, ‘केही शिक्षक साथीहरुलाई काम गर्न अप्ठ्यारो भएको छ ।’
पालिका अध्यक्षलाई दिएको ज्ञापनपत्र समेत उनले दर्ता नगरेको बुझिएको छ । पालिकाभित्रका शिक्षकहरुसँग हातमा हात मिलाएर शिक्षा क्षेत्र सुधार गर्नु पर्नेमा पालिका अध्यक्षले अधिकारको दुरुपयोग गर्दै शिक्षकहरुमाथि राजनीतिक प्रतिशोध साधेको उनीहरुको आरोप छ ।
केही समयअघि पालिकाभित्रका करारमा कार्यरत अनुभवी र दक्ष स्वास्थ्यकर्मीहरु हटाएको भन्दै उनको विरोध भएको थियो । अध्यक्षको यस सम्बन्धमा प्रतिकृया लिन खोज्दा उनी फोन सम्पर्कमा आउन चाहेनन् ।