अभिनेत्री शिल्पाको अभिनय अव नाटकघरमा हेर्न पाइने

नाटकमार्फत अभिनयलाई शून्यबाट नियाल्न पाएकी छु । दर्शकसँग प्रत्यक्ष साक्षात्कार गर्नाका साथै रङ्गमञ्चमा आफूलाई प्रस्तुत गर्न पाउँदा उत्साहित छु । यो मेरो पहिलो अनुभव हो

६ साउन । बत्तीसपुतलीस्थित शिल्पी थिएटरमा अभिनेत्री शिल्पा मास्के नाटकको पात्रको भूमिका गरिरहेको अवस्था भेटिने भएकी छिन् ।

शुक्रबारबाट मञ्चन भइरहेको नाटक ‘ट्रान्जिट’मा तीन अभिनेत्रीमध्ये एक भूमिका शिल्पाले निभाएकी हुन् । यो उनको पहिलो नाटक हो । अभिनेत्री मास्केले अभिनयलाई नजिकबाट बुझिरहेको बताइन् ।

एक ट्रान्जिटमा भेट भएपछि अघि बढ्ने कथा रहेको नाटकमा एउटै पात्र ‘मायावी’ लाई तीनजना अभिनेत्रीले चित्रण गरेका छन् ।
शुक्रबारदेखि नियमित मञ्चन भइरहेको उक्त नाटक भदौ २ गतेसम्म मञ्चन हुनेछ । कुमार नगरकोटीले लेखेको यस नाटकलाई घिमिरे युवराजले निर्देशन गरेका छन् ।

“नाटकमार्फत अभिनयलाई शून्यबाट नियाल्न पाएकी छु । दर्शकसँग प्रत्यक्ष साक्षात्कार गर्नाका साथै रङ्गमञ्चमा आफूलाई प्रस्तुत गर्न पाउँदा उत्साहित छु । यो मेरो पहिलो अनुभव हो”, अभिनेत्री मास्केले भनिन् ।

नाटकमा अभिनेत्री मास्केसँगै दिव्यदेव, आकाङ्क्षा कार्की, वासना तिमल्सिना, मिल्सन राई र घिमिरे युवराजलगायत कलाकारले अभिनय गरेका छन् ।

त्यस्तै थापागाउँस्थित मण्डला नाटकघरमा असार ८ देखि मञ्चन भएको मनोवैज्ञानिक (साइकोलोजिकल थ्रिलर) विधामा बनेको ‘हिउँभन्दा चिसो’ नाटक यही साउन १४ गतेसम्म मञ्चन हुनेछ । सोमनाथ खनालले निर्देशन गर्नुभएको नाटकमा कलाकार भोलाराज सापकोटा मुख्य भूमिकामा छन् ।

“चलचित्र र अन्य कामलाई मिलाएर नाटकघरमा प्रस्तुत भएको हुँ । आज÷भोलि भन्दै पाँच वर्ष बितिसकेछ । समय मिलाएर यसपटक नाटकमा अभिनय गरेको छु”, अभिनेता सापकोटाले भने । यसमा रेणु योगी, र गोविन्द सुनारको लगायतले अभिनय गरेका छन् ।