ग्वार्को फ्लाईओभर निर्माणको हालत (तस्विरहरु)

ललितखबर
४ फागुन । पछिल्लो समय ललितपुरको ग्वार्को सडक ट्राफिक जामका कारण यात्रा कष्टकर बनिरहेको छ । सरकारले नेपालकै पहिलो फ्लाईओभर निर्माण सुरु गरेपछि ठेकेदार कम्पनीले काम धिमा गतिमा अघि बढाउदा सास्ती बढेको हो ।

आजकल ठेकेदार कम्पनीले फ्लाईओभरको पुलको पिलर निर्माण गरिरहेको छ । बीच सडकमा वाल निर्माणका लागि स्ल्याप निर्माण भइरहेको छ भने पुलको लागि बनाइने सात वटा बिम लगभग निर्माण भइसकेको छ ।
पुलको पिलर निर्माणपछि केही समय सुक्न दिने अनि परिक्षण हुने निमार्ण कम्पनीले जानकारी दिएको छ । यी काम पुरा भएपछि विम राखेर ढलान गरिनेछ ।

सडकतर्फ भने प्वाल बनाएर ग्राइभेल राखेर खाद्ने काम भइरहेको छ । बीच सडकमा माटो भरेर उठाइनेछ । ग्वार्को चोकमा पुल निमार्णपछि वालकुमारी सातदोबाटोतर्फ पुलमाथिबाट गाडी गुढ्नेछन् भने मंगलबजार इमाडोलतर्फ जाने गाडी पुलमुनिबाट जानसक्नेछन् ।

लामो समयसम्म डिजाइन नमिलेको भन्दै काम अलपत्र छोडेको निर्माण कम्पनीले सिमित कामदार राखेर काम गर्दा फ्लाई ओभरको काम समयमै सकिनेका शंका उत्पन्न भएको सरकारी अधिकारीहरु बताउछन् । । फ्लाई ओभरको निर्माणअवधि छोटो हुँदै गएपछि ठेकेदार कम्पनीको कामको गति बल्ल बढाएको छ ।
गत २०७९ मंसिर २३ गतेबाट निर्माण सुरु भएको फ्लाई ओभरको निर्माण अवधि २ बर्ष रहेको छ ।