‘बोक्सीको घर’को ट्रेलर : दर्शक तर्साउने चलचित्र

२६ चैत्र । अभिनेत्री केकी अधिकारीको मुख्य अभिनय रहेको चलचित्र बोक्सीको घरको ट्रेलर सार्वजनिक भएको छ ।
चलचित्रको ट्रेलरमा मुख्य पात्र केकी अधिकारी हावी देखिन्छ । सबैजसो दृश्यमा बोक्सीको भाव झल्कने अभिनय छ । रातको दृश्यको बाहुल्य छ ।
चलचित्रको पृष्ठभूमिको आवाजले नै दर्शक तर्साउन खोजेको छ । लोचन रिजालले ब्याकग्राउण्ड म्युजिकमा मेहनत गरेको देखिन्छ ।
पिपलको बोट, कालो विरालो, रगत पत्पतिएकी महिला र रातो कपडा लगाएकी अभिनेत्री केकीको अभिनयले चलचित्र ‘हरर फिल्म’को साँकेतिक दृश्य झल्काउछ । टे«लर हेर्दा फरक सामाजिक कथा बोकेको चलचित्र बोक्सीको घरले हलभित्र दर्शक तर्साउनलायक देखिन्छ ।
बोक्सीको कथाबारे बुझ्न गाँउ पुगेकी पत्रकारको कथासँगै चलचित्र अघि बढेको संकेत ट्रेलरले गरेको छ ।
ट्रेलरमा अभिनेत्री केकीले आफ्नो अभिनय क्षमता निखारेको अनुभव हुन्छ । समाजमा यत्रतत्र रहेको बोक्सीका अनेकन् डरलाग्दो मनोविज्ञान बोकेको चलचित्र बोक्सीको घरले दर्शकलाई चलचित्रबारे थप चासो बढाएको छ ।

चलचित्रमा केकी अधिकारीसँगै सुपला सापकोटा, स्वेच्छा राउत, सुलक्षण भारती, रमा थपलिया, सुष्मा निरौला, सविन बास्तोलालगायत कलाकारको अभिनय छ ।
लोचन रिजालको ब्याकग्राउण्ड म्युजिक रहेको फिल्मलाई शिवराम श्रेष्ठले छायांकन, लोकेश बज्राचार्यले सम्पादन गरेका हुन्। टिफल्क फिल्म्सले फिल्मलाई वितरण गर्नेछ।