मुग्लिङ नारायणगढ सडक विस्तारको क्रममा स्काभेटर पुरिँदा चालक मृत्यु

चितवन
१३ जेठ । मुग्लिङ नारायणगढ सडक खण्डको तीन नम्बर पुलमा बा.२ क ८६५१ नम्बरको स्काभेटर पुरिँदा चालक बर्दिया गेडुवा गाउँपालिका–४ बस्ने ३८ वर्षीय मंगल चौधरीको आइतबार बिहान मृत्यु भएको छ ।
ईच्छाकामना गाउँपालिका–५ पर्ने यस पुलको लागि पहाड काट्ने क्रममा माथिबाट ढुङ्गा सहितको पहिरो खसेर चालक सहित स्काभेटर पुरिएको थियो । दुर्घटनापछि इलाका प्रहरी कार्यालय मुग्लिङबाट खटिएको प्रहरीले चालक चौधरीलाई गम्भीर घाइते अवस्थामा उद्दार गरी उपचारको लागि पुरानो मेडिकल कलेज भरतपुर लगेको थियो । उनको उपचारको क्रममा मृत्यु भएको प्रहरीले जानकारी दिएको छ ।
दुर्घटनाका क्रममा स्काभेटर पूर्णरूपमा क्षति भएको छ । सोही स्थानमा मुग्लिङबाट नारायणगढतर्फ जाँदै गरेको ना.६ ख १५११ नम्बरको ट्रकमा समेत सामान्य क्षति भएको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको जानकारी दिएको छ ।