काठमाडौँ
३२ साउन । भारत सरकारले सन् २०२२ का लागि ७०औं राष्ट्रिय चलचित्र पुरस्कार घोषणा गरेको छ । ७०औं राष्ट्रिय चलचित्र अवार्डमा उत्कृष्ट अभिनेत्रीको अवार्ड दुई अभिनेत्रीलाई संयुक्त रुपमा प्रदान गरिएको छ ।
नित्या मेननलाई तमिल चलचित्र तिरुचित्रम्बलमका लागि उत्कृष्ट अभिनेत्रीको अवार्ड दिइएको छ । यो चलचित्र सन् २०२२ मा प्रर्दशन भएको थियो । यस चलचित्रमा उनीसँगै अभिनेता धनुष देखिएका थिए ।
मानसी पारेखलाई गुजराती चलचित्र काक्ष एक्सप्रेसका लागि उत्कृष्ट अभिनेत्रीको अवार्ड पनि दिइएको छ । कन्नड अभिनेता ऋषभ शेट्टीलाई उनको चलचित्र कान्ताराका लागि उत्कृष्ट अभिनेताको अवार्ड दिइएको छ । कार्तिकेय–२ चलचित्रले वर्षको उत्कृष्ट तेलुगु चलचित्रको अवार्ड पाएको छ ।
पोन्नियिन सेल्भान पार्ट–१ ले वर्षको उत्कृष्ट तमिल चलचित्रको अवार्ड पाएको छ ।
केजीएफ च्याप्टर–२ ले वर्षको उत्कृष्ट कन्नड चलचित्रको अवार्ड पाएको छ । मनोज बाजपेयी र शर्मिला टगरको चलचित्र गुलमोहरले वर्षको उत्कृष्ट हिन्दी चलचित्रको अवार्ड पाएको छ । चलचित्र ब्रह्मास्त्र भाग १ का गीतका लागि संगीतकार प्रीतमले उत्कृष्ट संगीत निर्देशक (गीतका लागि) अवार्ड पाएका छन् ।
एआर रहमानलाई तमिल चलचित्र पोन्नियिन सेल्भान पार्ट–१ को पृष्ठभूमि संगीतका लागि उत्कृष्ट संगीत निर्देशकको अवार्ड दिइएको छ ।
फिल्म ब्रह्मास्त्र पार्ट १ मा गाएको केसरिया गीतका लागि अरिजित सिंहले सर्वोत्कृष्ट पुरुष गायकको अवार्ड पाएका छन् । निर्देशक सुरज बडजात्याले चलचित्र उचाईका लागि उत्कृष्ट निर्देशकको अवार्ड पाएका छन् । मलयालम चलचित्र अत्तमले उत्कृष्ट चलचित्रको अवार्ड पाएको छ ।
प्रतिक्रिया