बलिउड एक्शन चलचित्रका लागि शाहिद र बिशाल अनुबन्धित

काठमाडौँ
५ भदौं । बलिउड अभिनेता शाहिद कपूर र निर्माता निर्देशक विशाल भारद्वाजले सन् २००९ मा ’कमिने’ र २०१४ मा ’हैदर’ मा ठूलो पर्दामा सँगै काम गरेका थिए । दुवै चलचित्रले बक्स अफिसमा समेत शानदार कमाई गरेका थिए । अब फेरी निर्माता साजिद नाडियाडवालाले शाहिद र विशाललाई एक्शन–प्याक थ्रिलरको लागि एक साथ ल्याएका छन् ।

मिडिया रिपोर्टका अनुसार विशालको यो करियरको पहिलो एक्सन चलचित्र हुनेछ । रिपोर्टका अनुसार साजिद नाडियाडवाला, शाहिद कपूर र विशाल भारद्वाजले एक एक्शन थ्रिलरको लागि हात मिलाएका छन् । यो मिशनमा आधारित एक्शन थ्रिलर चलचित्र हुने बताइएको छ भने निर्माता नाडियाडवालाले यसलाई सबैभन्दा ठूलो तरिकामा प्रस्तुत गर्न लागेका छन् ।

रिपोर्टका अनुसार साजिद र विशालले यो भूमिकाका लागि शाहिद कपूर सबैभन्दा उपयुक्त रहेको विश्वास गरेका छन् । यति मात्र होइन, यो शीर्षकविहीन फिचर चलचित्रका लागि ६ एक्शन सेट निर्माण गर्ने योजना पनि बनाइएको बताइएको छ । रिपोर्टका अनुसार शाहिद यस एक्शन थ्रिलरको कथाबाट प्रभावित भएर तुरुन्तै यो चलचित्रमा अभिनय गर्न राजी भएका थिए । चलचि को छायांकन भारत र अमेरिकामा हुने बताइएको छ ।

अहिलेसम्म बनेका सबै चलचित्रभन्दा फरक ढंगले प्रस्तुत हुने यो चलचित्र आजका दर्शकका लागि बन्ने बताइएको छ । निर्माताहरूले ए–लिस्टर नायिकालाई मुख्य अभिनेत्रीको रूपमा कास्ट गर्न खोजिरहेका छन् । प्रि–प्रोडक्सनको काम सुरु भइसकेको छ र यो चलचित्र सन् २०२५ मा ठूलो पर्दामा आउनेछ ।