आफैं पत्रकार बनेर चलचित्र रावायणमा अभिनय गरेकी पुजाले पत्रकारलाई नै पढाएपछि…

ललितखबर
६ भदौं । चलचित्र रावायणमा अभिनेत्री पुजा शर्मा एक टेलिभिजन पत्रकारको भूमिकामा रहेको आज विहीबार सार्वजनिक ट्रेलरमार्फत खुलेको छ ।
आफैं पत्रकार बनेर क्रिटिकल (आलोचनात्मक) भूमिका निभाएकी अभिनेत्री पुजाले राजधानीमा आयोजित आफ्नो चलचित्रको समाचार भने सकारात्मक लेख्न भन्दै पत्रकारलाई सिकाइन् ।
उनले नेगेटिक समाचार धेरै पढ्ने भए पनि त्यो क्षणिक हुने तर्क गरिन् । नकारात्मक समाचारलाई एकातिर राखेर सकारात्मक लेख्न भन्दै पत्रकार सम्मेलनमै पढाएकी थिइन् । उनले भनिन्, ‘नराम्रो कुरालाई नहेर्नु होला । राम्रो राम्रो प्वाइन्टहरु लेख्नु होला ।’
पत्रकार सम्मेलनमै समाचार लेख्न सिकाएको सहभागी पत्रकारलाई मन परेको रहेनछ । कार्यक्रममा सहभागी एक पत्रकारले प्रश्न गरिन्, आफै पत्रकार भएर क्रिटिकल इस्युलाई चलचित्रमा देखाउदै अभिनय गर्ने अनि पत्रकारलाई यस्तो समाचार लेख्नु भन्न मिल्छ ?
अभिनेत्री पुजाले कुरा मोड्दै भनिन्, ‘समाचारको शिर्षक लेख्ने शैलीलाई आफूले टिप्पणी गरेको हुँ । म आफैं पनि पत्रकारिताबाट आएको मान्छे हुन् । यो कुरा बुझ्छु ।’ उनले कुनै कपडा लगाएको छ भने पत्रकारले कुन एङ्गलले तस्विर र भिडियो खिचेको छ भन्ने विषय उठाउन खोजेको बताउदै पञ्छन खोजेकी थिइन् ।

चलचित्रमा अभिनेत्री पूजा शर्मा टीभी पत्रकारको भूमिकामा रहेकी छन् । त्यस्तै अर्की अभिनेत्री प्रियंका कार्की मुश्लिम महिलाको भूमिकामा रहेकी छन् । ‘रावायण’ यही भदौ २१ गते अर्थात् तीजको बिदा पारेर प्रर्दशन गरिदै छ ।

सुदर्शन थापाको निर्माण तथा निर्देशन रहेको चलचित्रमा प्रमोद अग्रहरी, प्रकाश शाह, प्रदीप ढकाल, अर्जुनजंग शाही, कैलाश रावल, शर्मिला मल्ल लगायतको पनि अभिनय छ । एक गीतमा अभिनेत्री नीकिता चाण्डकको नृत्य गरेकी छन् ।

चलचित्रमा सौरभ लामाको छायांकन शिवम अधिकारीको लेखन, प्रदीप श्रीवास्तवको पटकथा, मिलन श्रेष्ठको सम्पादन एवं श्री श्रेष्ठको द्वन्द्व निर्देशन रहेको छ ।