चलचित्र ‘स्त्री–२’ को कमाई तीन सय करोडभन्दा धेरै

काठमाडौँ
७ भदौं । बलिउड चलचित्र ‘स्त्री–२’ ले भारतीय बक्स अफिसमा शानदार कमाई गरिरहेको छ । चलचित्रले प्रर्दशन सुरु भएको आठौ दिन विहिबार मात्र १८ करोड २० लाख कमाई गरेको छ ।

चलचित्र विश्लेषक तरण आदर्शका अनुसार चलचित्र ‘स्त्री–२’ले अहिलेसम्म ३०७ करोड ८० लाख कमाई गरिसकेको छ । योसँगै चलचित्र ‘स्त्री–२’ प्रर्दशनको आठौ दिन तीन सय करोड क्लबमा पुगेको हो ।

यसअघि चलचित्र जवान छैटौं दिन, पठान र एनिमल सातौँ दिन तीन करोड क्लबमा पुगेका थिए भने गदर–२ पनि आठौ दिनमा तीन सय करोड क्लबमा पुगेको थियो ।

चलचित्रले प्रर्दशनको पहिलो दिन विहिबार ५५ करोड ४० लाख कमाई गरेको थियो । त्यस्तै चलचित्रले बुधबार पेड रिभ्यु र प्रिमियरबाट ९.४० करोड कमाई गरेको थियो ।

त्यस्तै चलचित्रले शुक्रबार ३५.३० करोड, शनिबार ४५ करोड ७० लाख, आइतबार ५८ करोड २० लाख, सोमबार ३८ करोड ९० लाख, मंगलबार २६ करोड ८० लाख र बुधबार २० करोड ४० लाख कमाएको थियो ।

करिब ५० करोडको लागतमा बनेको यो चलचित्रले पहिलो दिनमा नै आफ्नो लागत उठाएको छ । यसअघि बनेको स्त्रीले आफ्नो पहिलो सातामा ६० करोड ३९ लाख कमाई गरेको थियो, जबकी स्त्री–२ ले पहिलो दिनमा नै सो अंकलाई पछाडी पारेको थियो ।

अमर कौशिकले निर्देशन गरेको स्त्री–२ मा श्रद्धा कपूर, राजकुमार राव, पंकज त्रिपाठी, अभिषेक बेनर्जीलगायतको अभिनय रहेको छ ।