चलचित्र ‘नरसिंहाः अवतार’ मा अभिनेता राज कटुवाल अनुबन्धित

 काठमाडौं
७ भदौं । चलचित्र ‘नरसिंहाः अवतार’ मा अभिनेता राज कटुवाल जोडिएका छन् । कटुवाल शुक्रबार अनुबन्धित भएका हुन् ।
निर्देशक दिवाकर भट्टराईले निर्देशन गर्न लागेको चलचित्रमा महानायक राजेश हमाल, नीति शाह, सरोज खनाल, प्रशान्त ताम्राकार, नीर शाह, सनिशा भट्टराई र दीपा शाही अनुबन्धित भइसकेका छन् ।
एक्सन तथा सोसल ड्रामामा बन्ने यो चलचित्रमा अनुबन्धित भएपछि कटुवालले यो चलचित्रमा जोडिन पाउँदा अत्यन्तै खुसी रहेको व्यक्त गरे । ’आफूले काम गर्दै आएको क्षेत्रमा कुनै पनि चलचित्रमा जोडिन पाउनु नै एउटा कलाकारकोलागि महत्त्वपूर्ण कुरा हो’, उनले भने, ’निर्देशकले मलाई ठूलो जिम्मेवारी दिनुभएको छ, साथै म आफैँले समेत धेरै मेहनत गर्नु पर्ने देखिएको । चलचित्रका लागि गर्नु भएको विश्वास मैले पुरा गर्ने छु ।’

यही चलचित्रबाट आठ वर्षपछि महानायक हमालले कम्ब्याक गर्दैछन् । धेरै समय पछि हमाल चलचित्रमा फर्किने खबरले यतिबेला नेपाली चलचित्रवृत तताएको छ ।
यता, क्याप्टेनपछि निर्देशक भट्टराईको चलचित्रमा अभिनेता सरोजले अभिनय गर्न लागेका छन् भने हमाल र खनाल ३० वर्षपछि सँगै एउटै चलचित्रमा देखिन लागेका हुन् । उनीहरूले सन् १९९४ सेप्टेम्बर २७ मा प्रिर्दशन भएको चलचित्र ‘सडक’मा सँगै काम गरेका थिए । तीर्थ थापाले निर्देशन गरेको उक्त चलचित्रपछि यी दुईले सँगै काम गरेका छैनन् ।

यस्तै, निर्देशक भट्टराई र अभिनेता ताम्राकारले यस अघि ‘ऐश्वर्या’, ‘क्याप्टेन’ र ‘मायावी’मा पनि सहकार्य गरेका थिए ।

चलचित्र यही भदौको अन्तिम साताबाट छायाङ्कनमा जाने तयारीमा रहेको छ । चलचित्रको लगानी तीन करोडभन्दा माथि हुने बताइएको छ ।

निर्देशक भट्टराईको अर्को चलचित्र ‘मायावी’ प्रदर्शनको तयारीमा छ । निर्देशक भट्टराईका अनुसार अब यो चलचित्रको केही दिनमै प्रदर्शन मिति तय गरिने छ ।