‘होस्टेल ३’ निरन्तर ५१ दिनसम्म प्रर्दशन, कलाकारहरु सम्मानित

काठमाडौं
गत फागुन २३ गतेदेखि प्रदर्शनमा आएको नेपाली चलचित्र ‘होस्टेल ३’ले काठमाडौंको न्यूरोडस्थित रञ्जना चलचित्र भवनमा आज लगातार ५१ औँ दिन पूरा गरेको छ । चलचित्र लगातार ५१ औं दिनसम्म हुन सफल भएको भन्दै निर्माण पक्षले विशेष कार्यक्रम आयोजना गरेर कलाकार र निर्माणमा सम्बद्धहरुलाई सम्मान गरेको छ ।
कार्यक्रममा कलाकारहरू पारस बम (कुलब्वाय), सिम्रन पन्त, हेना नगरकोटी, आशिष घिमिरे र सन्तोष बानियाँ लगायतलाई सम्मान पत्र वितरण गरिएको थियो ।
कार्यक्रममा चलचित्रमा विशेष भूमिका निभाएका लोकप्रिय कलाकार केदार घिमिरे पनि सहभागी भएर प्रमाणपत्र वितरण गरेका थिए । उनले ‘होस्टेल ३’मा अभिनय गरेका नयाँ कलाकारहरूको पहिलो चलचित्र नै सफल भएकोमा खुसी व्यक्त गर्दै, आफ्नो छोरा आशिष घिमिरेसहित अन्य कलाकारहरूको सफलताले आफू भावुक बनेको बताए ।

नयाँ पुस्ताका कलाकारहरूले आफ्नो पहिलो चलचित्र नै दर्शकको प्रेमले सफल बनाएको भन्दै आभार प्रकट गरे । उनीहरूले ‘होस्टेल ३’लाई आफूहरूका लागि ’विश्वविद्यालय’ भएको बताउँदै यस चलचित्रबाट सिकेको अनुभव अमूल्य रहेको उल्लेख गरे ।

निर्देशक सशान कँडेल, लेखक तथा एसोसियट निर्देशक माधव शर्मा र निर्माता कर्ण कार्कीले चलचित्रलाई साथ र समर्थन गरेका दर्शक तथा पत्रकारहरूप्रति धन्यवाद व्यक्त गरे ।

‘होस्टेल’ चलचित्र शृङ्खला नेपाली चलचित्र क्षेत्रमा नयाँ पुस्ताका कलाकारहरूलाई स्थापित गर्ने चलचित्रका रूपमा चिनिन्छ । यसको तेस्रो श्रङ्खला ’होस्टेल ३’ले पनि व्यापक सम्भावना बोकेका केही कलाकारलाई परिचित गराएको छ ।

चलचित्रका निर्माता सुरेश कँडेल, कर्ण कार्की र गोविन्द अधिकारी हुन् भने सह–निर्मातामा शिशिर ज्ञवाली, अनीश सिग्देल, कुन्दन गुप्ता र गणेश मगर रहेका छन् । शङ्कर कोइराला कार्यकारी निर्माता हुन् भने कोसिस राज क्षेत्री लाइन प्रोड्युसर हुन् ।