चलचित्र ‘महाभोज’को विशेष प्रदर्शनीमा सहकारी पीडितले गरे नाराबाजी

राज्यले नसुनेको पीडितको आवाज ‘महाभोज’ले पर्दाबाट बोलेको छ

काठमाडौं
पछिल्लो समय देशभरका सहकारीमा समस्या छ । ठाँउ ठाँउमा सहकारी पिडितले नाराबाजी गरिरहेको देखिनु नौलो कुरा होइन ।
मंगलबार राजधानीको सुन्धारास्थित एक चलचित्र भवनमा सहकारी पिडितहरुले नाराबाजी गरेका छन् ।

पिडितहरुले कुनै सहकारीविरुद्ध वा सरकारसँग माग राखेर नाराबाजी गरेका भने होइनन् । चलचित्र महाभोज हेरेर सहकारी पिडितहरुको उत्साहित हुँदै नाराबाजी गरेका हुन् ।
निर्माण पक्षले देशभरका ६० जना सहकारी पीडितहरूलाई चलचित्रको रिभ्युका लागि सहभागि गराएको थियो ।

सहकारी पीडितहरूले चलचित्रले उनीहरूकै जीवनको यथार्थ प्रतिबिम्ब झल्काएको अनुभव सुनाउँदै यसको विषयवस्तुले आफूहरूलाई न्यायका लागि अझ सशक्त र प्रेरित बनाएको बताए । चलचित्र प्रदर्शनपछि उनीहरूले सञ्चारकर्मीहरूसामु नाराबाजीसहित उत्साह व्यक्त गर्दै भने, “राज्यले नसुनेको पीडितको आवाज ‘महाभोज’ले पर्दाबाट बोलेको छ ।”

सहभागी पिडितहरुले निर्माण पक्षले राम्रो चलचित्र निर्माण गरेको भन्दै प्रशंसा गरेको सुनिन्थ्यो । उनीहरुले सहकारी पिडितहरुलाई समस्या समाधान गर्न सही बाटो देखाएको समेत प्रतिकृया दिए । चलचित्रले मनोरञ्जनसँगै आन्दोलनको आवाज उठाएको बताएका छन् ।

चलचित्रको प्रर्दशनीका क्रममा सहभागीहरुले निर्देशक राउतको निर्देशकीय क्षमताको प्रशंसा गरेका छन् ।

यसैबीच, देशभरका प्रमुख मल्टिप्लेक्स तथा सिङ्गल स्क्रिन हलहरूले ‘महाभोज’ को अग्रिम बुकिङ खुला गरिसकेका छन् । वितरकहरूका अनुसार यो चलचित्र करिब २ सय शो सहित नेपालभर प्रदर्शन हुँदैछ ।

दयाहाङ राई, आर्यन सिग्देल, खगेन्द्र लामिछाने, अञ्जना बराइली, मलिका महत, गौमाया गुरुङ, वसुन्धरा भुसाल र मोहन निरौलाको प्रमुख अभिनय रहेको ‘महाभोज’ सहकारी संस्था सम्बन्धी एउटा गम्भीर सामाजिक विषयमा आधारित छ । चलचित्रले सहकारी संस्थामा बचत गरेको रकम डुबेपछि उत्पन्न हुने अवस्थालाई मर्मस्पर्शी ढङ्गले चित्रण गरेको छ । पीडितहरूको वेदना, जागिरेहरूको मानसिक सङ्घर्ष र राजनीतिक चलखेल चलचित्रको मूल कथा बन्छ । साथमा, यस चलचित्रले हास्यपरक रूपमा चलचित्रका पात्रहरूलाई पनि प्रयोग गरी चलचित्रलाई मनोरञ्जक समेत बनाइएको छ ।

क्लक वर्क क्रियशन र पिक्चर फ्रेमको संयुक्त प्रस्तुति रहेको यो चलचित्रले नेपालसँगै विदेशका केही मुलुकहरूमा समेत एकसाथ प्रदर्शनको तयारी गरेको छ ।
चलचित्र महाभोज भोली विहीबार गणतन्त्र दिवसको सन्दर्भ पारेर प्रर्दशन सुरु हुँदेछ ।