रुबी हत्या प्रकरणः लक्ष्मण पासवानले घटना स्वीकारे तर परिवारमाथि आरोप नै आरोप

काठमाडौं । रौतहटकी रुबी साहको हत्याका मुख्य दोषी मानिएका लक्ष्मण पासवानले हत्या आफूले नै गरेको स्वीकार गरेका छन् ।

पासवानले बुधबार बिहान एक भिडियो सार्वजनिक गर्दै आफूले नै रुबीको हत्या गरेको र आफू पनि बाँच्न नचाहेको खुलाएका थिए । त्यसो त भिडियो सार्वजनिकपछि पासवानले पनि आत्मदाहको प्रयास गरेका थिए । प्रहरीले गम्भीर घाइते अवस्थामा रौतहटको माधवनारायण नगरपालिका–६ स्थित खेतबाट पासवानको उद्धार गरेको थियो ।

पासवानलाई उद्धार गरी रौतहटमै प्राथमिक उपचारपछि थप उपचारका लागि काठमाडौंको कीर्तिपुरस्थित बर्न अस्पतालमा ल्याइएको छ । पासवानका अनुसार उनीहरु दुवैले यसअघि नै प्रेम विवाह गरिसकेका थिए । स्कुल पढ्ने बेलै लभमा परेको र कक्षा १० मा पुगेपछि आफूहरु भागेको बताए । उनीहरुले भागेर सर्लाहीमा पुगेर आफूखुसी विवाह गरेका थिए । रुबीको आमाले आफूसँग पैसा नभएका कारण रुबी र आफूलाई अलग गरिदिएको आरोप लगाएका छन् ।

परिवारले नै सम्बन्ध स्वीकार नगरेपछि छुट्टिएका उनीहरु दुवैले विवाह गरेका थिए । रुबीले भारतमा बिहे गरेकी थिइन् । तर नेपालमा आएका बेला रुबीकी आमाले निरन्तर दुवैको नाम लिएर आफूहरुलाई गाली गर्ने गरेको समेत आरोप लगाएका छन् ।

पासवानले आफैँले रुबीको हत्या गरेको स्वीकार सोही भिडियोमार्फत् गरेका थिए । उनले आजै बिहान सो भिडियो कुमारी ज्योती भन्ने आइडीबाट अपलोड गरेका थिए । प्रहरीप्रति आफ्नो सम्मान रहेको बताउँदै आफूले सजाय भोग्न तयार रहेको तर आफ्नो सजाय आफैँ गर्ने समेत बताएका छन् । प्रहरीले पक्राउ गरेमा आफूले सजाय काटेर केही वर्षमा निस्किने तर आफूलाई बाँच्नै मन नभएको भन्दै आगो लगाएर मर्ने बताएका थिए ।