चलचित्र ‘मोहर’ प्रर्दशनको एक महिनापछि दर्शकले पाउदैछन् ‘सुनको मोहर’ जित्ने अवसर

चलचित्र ‘मोहर’ प्रर्दशनको एक महिनापछि निर्माण पक्षले दर्शक आर्कर्शित गर्न ‘सुनको मोहर’ उपहार लिएर आएको छ ।

गएको साउनको २३ गतेबाट प्रर्दशन सुरु भएको चलचित्र ‘मोहर’ अहिले हलमा प्रर्दशन भइरहेको छ । चार वटा हलमा गएर यो चलचित्र हेर्ने दर्शकले यो पुरस्कार जित्न सक्नेछन् । चितवनको ‘म्याङ्गो जन ज्योती सिनेमा’, समाखुशीको ‘क्यूएफएक्स स्क्वायर मल’, किर्तिपुरको ‘किर्तिपुर सिनेप्लेक्स’ र न्यूरोडको ‘रञ्जना सिनेप्लेक्स’मा गएर फिल्म हेर्ने दर्शकले यो पुरस्कार जित्न सक्ने निर्माण पक्षले जानकारी दिएको छ ।
म्याङ्गोमा चलचित्र हेर्नेमध्ये ३ जना, सिटी स्क्वायरमा चलचित्र हेर्नेमध्ये २ जना, किर्तिपुर सिनेप्लेक्समा चलचित्र हेर्ने मध्ये २ जना र रञ्जना सिनेप्लेक्समा चलचित्र हेर्नेमध्ये २ जनाले यो पुरस्कार प्राप्त गर्नेछन् ।

दर्शकले चलचित्रको टिकटको पछाडि आफ्नो नाम र मोबाइल नम्बर लेखेर हलमा राखिएको बक्समा आफ्नो टिकट खसाल्नुपर्नेछ । जसमध्ये, भदौको २३ गतेबाट असोजको ११ गतेसम्म चलचित्र हेर्ने दर्शकमध्ये ९ जनाले यो पुरस्कार जित्न सक्नेछन् ।

भदौ २३ गते भन्दा अगाडि चलचित्र हेरेका दर्शकले पनि आफ्नो टिकट सुरक्षित राखेको भए यो उपहार योजनामा सहभागी हुन पाउने निर्माणपक्षको भनाई छ ।
विजेताहरुलाई फिल्मको ५१ दिने कार्यक्रममा पुरस्कार हस्तान्तरण गरिने निर्माणपक्षले बताएको छ ।
यो चलचित्रले बक्स अफिसमा सुखद कमाई गर्यो । वर्षकै दोस्रो हिट चलचित्रमा ‘मोहर’ले आफ्नो नाम लेखाइसकेको छ ।
अब, यसको निर्माणपक्षले चलचित्र प्रर्दशन भएको एक महिनापछि दर्शकहरुका लागि ‘सुनको मोहर’ जित्ने अवसर ल्याएको हो ।
ओम प्रतिकको लेखन तथा निर्देशनमा चुम्बन जंग शाहीले निर्माण गरेको यो चलचित्रले बक्स अफिसमा ५ करोड माथिको व्यापार गरिसकेको छ ।
पल शाह, नीति शाह, बेनिशा हमाल, अर्जुन जंग शाही, मिथिला शर्मा, लक्ष्मी गिरी, रविन्द्र झा, सारा शर्मा लगायतका कलाकारहरुको यो चलचित्रमा अभिनय छ । फिल्म मेकर्स प्रा.लिले यो चलचित्र निर्माण गरेको हो ।