तोसिमा कार्की भन्छिन्– जेन जी पुस्तालाई आन्दोलनको क्षतिको दोष नलगाउनुस्

काठमाडौं । राष्ट्रिय स्वतन्त्र पार्टीकी सांसद तोसिमा कार्कीले जेन जी आन्दोलनका क्रममा भएको क्षतिको दोष जेन जी पुस्तालाई नलगाउन आग्रह गरेकी छन् ।

उनले जेन जी पुस्ताको साहसकै कारण देश भ्रष्टहरूको चङ्गुलबाट मुक्त भएको बताइन् ।

सांसद कार्कीले भनिन्, ‘देशमा भएको सम्पूर्ण क्षति र विनाशको दोष नवयुवालाई नभई, विगतमा देश लुट्ने भ्रष्टहरूलाई र हामी सबै नेपालीलाई लिनुपर्छ। नयाँ नेपालको नेतृत्व, अन्तरिम सरकार निर्माण र भावी सुनौलो नेपाल निर्माण गर्ने जिम्मा भने जेन जी पुस्ताकै हो ।’

उनले कांग्रेस, एमाले, माओवादी, राप्रपा, रास्वपाका सबै दललाई नयाँ नेपाल निर्माणमा सक्दो सहयोग गर्न आह्वान गरिन् । साथै, विदेशी हस्तक्षेपबाट देशलाई जोगाउनुपर्नेमा जोड दिँदै उनले जेन जी पुस्तालाई संयमित, सुरक्षित र जिम्मेवार भएर अघि बढ्न आग्रह गरिन् ।

‘म पनि सधैँ तपाईँहरूको साथमा इमानदार भएर उभिनेछु, जसरी तपाईँहरूले दुई दिनमै भ्रष्टहरूको पञ्जाबाट देशलाई आजाद बनाउनुभयो,’उनले बताइन् ।