असोजमा प्रर्दशन हुँदेछन् पाँच नयाँ नेपाली चलचित्र

ललितखबर
विस्तारै नेपाली चलचित्रको बजार विस्तार भइरहेको छ । फरक फरक जनरामा चलचित्र निर्माण हुनेक्रम बढेसँगै एकातिर नेपालमा दर्शकको चलचित्रप्रति चासो बढ्दो छ भने देश बाहिर नेपालीहरुको बस्ती रहेको सहरमा चलचित्रको शोहरु थपिन सुरु भएको छ । पछिल्लो समय नेपाली चलचित्र निर्माणको क्रम पनि बढ्न थालेको छ ।
बडादशैंको उत्सवबीच यही असोजमा ५ चलचित्र प्रर्दशनको तरखरमा छन् ।
पहिलो शुक्रबार आज असोज ६ गते कुनै नयाँ चलचित्र प्रर्दशन सुरु भएन । जेनजीको आन्दोलनका कारण शिथिल बजारमा चलचित्र चलाउन आँट नगरेका निर्माता र प्रर्दशनले आउँदो शुक्रबारबार पनि नयाँ चलचित्र प्रर्दशन गर्ने कुनै योजना छैन । बल्ल सोमबार ३ नयाँ चलचित्र प्रर्दशनको तरखरमा छन् ।
असोज १३ गते सोमबार बडा दशैंको फुलपाती पर्वको अवसर पारेर ‘हरिबहादुरको जुत्ता’ प्रर्दशन हुनेछ । हास्य अभिनेता हरिवंश आचार्य, प्रकाश सपुत र स्वस्तिमा खड्काको अभिनय रहेको यस चलचित्रलाई दिपेन्द्र के खनालले निर्देशन गरेका छन् ।
फुलपातीको दिन मिलन तामाङको निर्देशनमा बनेको चलचित्र ‘माइतीघर’ पनि प्रर्दशनको तयारीमा छ । सो चलचित्रमा धिरज मगर,उपासना सिंह ठकुरी, केदार घिमिरे माग्नेबुढाको अभिनय रहेको छ । सोही दिन सन्तोष सेनको निर्देशनमा तयार भएको एक्सनले भरिएको चलचित्र ‘बलिदान’ प्रर्दशन हुनेछ । चलचित्रमा समिर भट्ट,सौगात मल्ल,अर्पण थापा र ऋचा शर्मालगायत कलाकारको अभिनय हेर्न पाइन्छ ।
त्यसपछि असोज २४ गते एकै पल्ट चलचित्र ‘अभिमन्य च्याप्टर १’ प्रर्दशन हुने घोषणा गरिएको छ । सुशान्त गौत्तमको निर्देशन रहेको सो चलचित्रमा कामेश्वर चौरसिया,लक्ष्मी बर्देवा र गौमाया गुरुङलगायत कलाकारको प्रस्तुती छ ।
यो महिनाको अन्त असोज ३१ गते शुक्रबाटबाट अनमोल केसीको ‘जेरी अन टप’ प्रर्दशनको तयारीमा छ । चलचित्रमा अनमोलसँगै जसिता गुरुङ र आचल शर्माको त्रिकोणात्मक प्रेमकथा समेटिएको छ । चलचित्रमा केदार घिमिरे समेत रहेकाले उनको हास्यप्रस्तुती रहेको अनुमान गर्न सकिन्छ ।