नेता हर्क साम्पाङ भन्छन्,‘बहुमत ल्याएर देशलाई अघि बढाउछौं’

ताप्लेजुङ
श्रम संस्कृति पार्टीका अध्यक्ष हर्क साम्पाङले देशमा व्याप्त भ्रष्टाचार, विभेद र राजनीतिक अस्थिरताका कारण आमूल परिवर्तन नभएको बताएका छन् । ताप्लेजुङमा आज आयोजित पार्टीको कार्यक्रममा साम्पाङले बढ्दो भ्रष्टाचार, विभेद, श्रमको सम्मान नहुनुजस्ता कारणले देश विकासको बाटोमा अघि बढ्न नसकिरहेको जिकिर गरे ।

अध्यक्ष साम्पाङले देश परिवर्तन गर्न श्रम संस्कृति पार्टीले बहुमत ल्याएर देशलाई परिवर्तनको बाटोमा अघि बढाउने दाबी गरे । उनले विदेशीको इसारामा नचल्ने, नेपालको माटो–भूमि संरक्षण गर्ने, नागरिकलाई श्रममार्फत आत्मनिर्भर बनाउने र शिक्षामा व्यावहारिक परिवर्तन ल्याउनेजस्ता विषय आफ्ना प्राथमिकतामा रहेको भन्दै आगामी निर्वाचनमा भोटका लागि अपिलसमेत गरेका छन् ।

जनताको जितका लागि श्रमको सम्मान, व्यावहारिक शिक्षा र सादगी जीवनमार्फत राष्ट्रलाई समृद्धितर्फ लैजाने नै पार्टीको लक्ष्य रहेकाले सोहीअनुसार अघि बढ्ने प्रतिवद्धता व्यक्त गरेका छन् । श्रम संस्कार, संस्कृति र प्रविधिको विकाससहित अघि बढ्ने आफ्नो पार्टीको लक्ष्य रहेको उनको भनाइ छ ।