चलचित्र ’कुमारी’को देशभरका हलहरुमा सुखद व्यापार

काठमाडौं
नेपाली प्रेम कथानक चलचित्र ’कुमारी’ आजबाट देशभरका सिनेमा हलहरूमा प्रदर्शन सुरु भएको छ । निर्माण पक्षले देशभरका हलहरूबाट प्राप्त जानकारीहरु उदृत गर्दै
दर्शकहरुको उत्साहजनक साथ पाएको बताएको छ । दर्शकबाट एकदमै सकारात्मक प्रतिक्रिया प्राप्त गरेको र दर्शकहरूले नयाँ कलाकारहरूको काम र निर्देशकको प्रस्तुतिको प्रशंसा गरेका छन्।
चलचित्र निर्देशक दिनेश राउतले यस चलचित्रको निर्देशन गरेका हुन्। यस चलचित्रमा अविषेक खड्का र आकृति राजभण्डारीले मुख्य भूमिकामा डेब्यु गरेका छन्। उनीहरूसँगै पर्दामा घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने र मनषा शर्मा लगायतका कलाकारहरूको अभिनय रहेको छ ।

महेन्द्र अधिकारीले निर्माण गरेको यस चलचित्रका कार्यकारी निर्माता केदार भुसाल हुन्। चलचित्रको प्राविधिक पक्ष पनि बलियो रहेको दाबी गरिएको छ। विकास सुवेदीको लेखन रहेको ’कुमारी’ मा सुसन प्रजापतिको छायाङ्कन र सुप्रिम पराजुलीको सम्पादन रहेको छ। रोयल भीमसेनले पोस्टर तथा पब्लिसिटी डिजाइन गरेको यो चलचित्रले मौलिक कथा वाचनमार्फत दर्शकको मन जित्ने निर्माण पक्षको विश्वास छ।