इलाम
नेपालको पुर्वी भूभागमा रहेको इलाममा चलचित्र भवन ‘फ्रेन्ड्स सिनेमाज्’ खुल्दै छ ।
धरान र बुटवलपछि फ्रेन्डस् सिनेमाले आफ्नो तेस्रो शाखा इलाममा विस्तार गरेको हो ।
आउँदो शुक्रबारबाट सञ्चालनमा आउने यो चलचित्र घर साढे तीन करोड लगानीमा निर्माण भएको निर्देशक आशिस एच तामाङले जानकारी दिएका छन् ।
चलचित्र भवनमा एउटा स्क्रिन छ । जहाँ १ सय ९० सिट रहेका छन् । चलचित्र विकास बोर्डले शुक्रबारबाट हल सञ्चालनको लागि अनुमति दिइसकेको छ ।
“ठूला सहरमा मात्रै चलचित्र घर रहेको अवस्थामा हामीले गाउँगाउँमा पनि चलचित्र देखाउने र हेर्ने वातावरण बनाउँदै लैजानुपर्छ भनेर पहाडी जिल्ला इलाममा हल खोलेका हौँ,” तामाङले भने, “हामी सिनेमाको बजार विस्तार गर्नुपर्छ भन्छौँ, तर चलचित्र घर भने काठमाडौं र ठूलो सहरमा मात्रै केन्द्रित गर्छौं । बजार विस्तार गर्ने हो भने हरेक जिल्लामा सुविधासम्पन्न हल सञ्चालनमा आउनुपर्छ ।”
उनले सम्भव भएसम्म अन्य जिल्लामा पनि हल विस्तार गर्ने योजना रहेको बताए । नेपाली चलचित्रको बजार विस्तार गर्ने हो भने पहिला घरेलु बजार नै बढाउँदै लैजानु पर्ने उनको धारणा छ ।
अहिले पनि ठूला सहरमा बस्नेबाहेकका दर्शकलाई हलमा चलचित्र हेर्न वातावरण नरहेको भन्दै तामाङ जिल्ला–जिल्लामा सानासाना सिनेमा घर खोल्ने हो भने अहिलेकै अवस्थामा पनि घरेलु बजार दोब्बरभन्दा माथि बढ्ने बताउँछन् ।
प्रतिक्रिया