वैशाख महिनामा पाँच नयाँ चलचित्र प्रर्दशन

ललितखबर
यो वैशाख महिनामा पाँच नयाँ चलचित्र प्रर्दशन हुने तय भएको छ ।
चलचित्र विकास वोर्डका अनुसार गएको नयाँ वर्ष शुभारम्भका दिन तुलसी घिमिरेको निर्देशन रहेको चलचित्र पहाड प्रर्दशन सुरु भएको छ । यस चलचित्रमा मदनकृष्ण श्रेष्ठ, विपिन कार्की, सुनिल थापालगायत कलाकारहरुको अभिनय रहेको छ ।
वैशाखको पहिलो शुक्रबार कुनै नयाँ चलचित्र प्रर्दशनको तालिका नभए पनि दोश्रो साता वैशाख ११ गते लक्ष्मण सुनार निर्देशत चलचित्र परालको आगो हलमा लाग्दै छ । यस चलचित्रमा प्रकाश सपुत, सुहाना थापा, सौगात मल्ल, श्रृजना थापालगायत कलाकारहरुको अभिनय हेर्न पाइन्छ ।
तेश्रो शुक्रबार वैशाख १८ गते यम थापाको निर्देशनमा बनेको चलचित्र लाली बजारको प्रर्दशन तालिका छ । यस चलचित्रमा स्वस्तिमा खड्का र रविन्द्रसिंह बानियालगायतको अभिनय हेर्न पाइन्छ ।
यो महिनाको अन्तिम शुक्रबार वैशाख २५ गते प्रेम एसओआई सुनारको निर्देशनमा बनेको चलचित्र गुरु आमा प्रर्दशनको तयारीमा छ । चलचित्रको शिर्ष भूमिकामा गौरी मल्ल र मिथिला शर्मा छिन् ।
सोही दिन प्रकु पाण्डेको चलचित्र मालती मंगले प्रर्दशनको तयारीमा छ । गायक रामकृष्ण ढकालको निर्माण रहेको चलचित्रको शिष भूमिकामा वर्षा राउत र विजय बरालको जोडीलाई प्रस्तुत गरिएको छ ।