पाँच महिनापछि संवैधानिक इजलास शुरु

२० फागुन ०७८, काठमाडौं । पाँच महिनादेखि बस्न नसकेको संवैधानिक इजलास शुक्रबारदेखि शुरु भएको छ । शुक्रबार कायममुकायम प्रधानन्यायाधीश दीपककुमार कार्कीले संवैधानिक इजलासको गठन गरेका छन् ।

संसदमा महाभियोगको प्रस्ताव दर्ता भएसँगै प्रधानन्यायाधीश चोलेन्द्रशम्शेर जबरा निलम्बनमा परेपछि कायममुकायम प्रधानन्यायाधीश कार्कीले संवैधानिक इजलासको गठन गरेका हुन् ।

कायममुकायम प्रधानन्यायाधीश कार्कीले इजलासमा वरिष्ठतम् न्यायाधीश मीरा खड्का, न्यायाधीशहरू हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडाको इजलास गठन गरेका छन् ।

यो इजलासमा सामान्यतया वरिष्ठताका आधारमा न्यायाधीशको चयन हुँदै आएको छ । हप्ताको दुईदिन बुधबार र शुक्रबार संवैधानिक इजलास बस्ने गरेको छ ।

संवैधानिक इजलासको पहिलो पेसीमा सामान्य प्रकृतिका मुद्दा मात्रै समावेश गरिएको छ ।