शिवरात्रीमा पशुपति–माइतीघर मण्डला शोभायात्रा

६ फागुन ०७६, काठमाडौं । प्रत्येक वर्ष फागुन कृष्ण त्रयोदशीका दिन मनाइने महाशिवरात्रीमा पशुपतिदेखि माइतीघर मण्डलासम्म शोभायात्रा निकालिएको छ । यस वर्ष नेपाल भ्रमण वर्षसँग जोडेर शिवरात्री पर्व भव्यताका साथ मनाउन प्रचारप्रसार गर्ने उद्देश्यले शोभायात्रा निकाल्न लागिएको हो ।
बिहान पशुपतिनाथ मूल मन्दिरको पश्चिम ढोकाअघि संस्कृति, पर्यटन तथा नागरिक उड्डयनमन्त्री योगेशकुमार भट्टराईले शोभायात्राको शुभारम्भ गर्नुभयो । शोभायात्रामा नेपाली सेना, नेपाल प्रहरी, सशस्त्र प्रहरी बल, पशुपति बहुमुखी क्याम्पसलगायत शैक्षिक संस्थाका विद्यार्थी, बैंक एवं वित्तीय संस्थाका कर्मचारीलगायत भक्तजन र सर्वसाधारण गरी १० हजारभन्दा बढीको सहभागिता थियो । शोभायात्रामा मन्त्रालयका सचिव केदारबहादुर अधिकारीलगायत कोषका पदाधिकारीहरुको सहभागिता थियो ।
यात्रामा सांस्कृतिक झाँकीसहित महाशिवरात्रि र नेपाल भ्रमण वर्षको समेत प्रचारप्रसार गरिएको थियो । महाशिवरात्रिमा धेरैभन्दा धेरै धार्मिक पर्यटक भित्र्याउन आज बिहान पशुपतिदेखि तिलगङ्गा–एयरपोर्ट–तीनकुने–नयाँबानेश्वर–बिजुलीबजार–बबरमहल हुँदै माइतीघर मण्डलासम्म शोभायात्रा निकालिएको कोषका सदस्यसचिव डा प्रदीप ढकालले बताउनुभयो ।

नेपालीले राष्ट्रदेवका रुपमा पूजाआराधना गर्ने पशुपतिनाथलाई द्वादश ज्योतिर्लिङ्गको पनि ज्योतिर्लिङ्गका रुपमा विश्वका विभिन्न देशमा रहेका वैदिक सनातन धर्मावलम्बीले मान्छन् । विश्वभर छरिएर रहेका हिन्दू धर्मावलम्बीले एकपटक आइपुग्नै पर्ने गन्तव्यस्थलका रुपमा पशुपतिनाथलाई राख्ने गरेका छन् ।
पशुपति क्षेत्र विकास कोषले यस वर्षको महाशिवरात्रिलाई नेपाल भ्रमण वर्षसँग जोडेर भव्य रुपमा मनाउन विभिन्न कार्यक्रम गरिरहेको छ । महाशिवरात्रि मनाउन कोष सञ्चालक परिषद् अध्यक्ष रहनुभएका संस्कृति, पर्यटन तथा नागरिक उड्डयनमन्त्री भट्टराईको अध्यक्षतामा १११ सदस्यीय मूल समारोह समिति गठन गरिएको छ । समितिअन्तर्गत ११ उपसमिति पनि गठन भएको छ ।
महाशिवरात्रिका लागि पशुपतिमा सबै तयारी पूरा भइसकेको जनाइएको छ । यस वर्ष अहिलेसम्म दुई हजारभन्दा बढी साधुसन्त पशुपति क्षेत्रका विभिन्न अखडामा आइबसेका छन् । फागुनकृष्ण एकादशीका दिन बिहानदेखि साधुसन्तलाई पशुपतिको मूल मन्दिरमा प्रवेश गराइनेछ । अन्तिम तयारीस्वरुप बुधबार बिहान पशुपति क्षेत्रमा बृहत् सफाइ गरिने कोषका प्रशासकीय अधिकृत गौरीशङ्कर पराजुलीले बताउनुभयो ।

महाशिवरात्रिका अवसरमा पशुपति क्षेत्रलाई फूलमालाले सजाइनेछ । मन्दिर सजाउन यस वर्ष केही भक्तजनले विभिन्न देशबाट फूलमाला मगाएको जनाइएको छ ।