९ फाल्गुन २०८०, बुधबार | Thu Feb 22 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

स्थानीय समाचार


काभ्रे प्रशासनमा सेवा लिन पालो कुर्नु पर्ने




१३ पुस ०७८, धलिखेल । जिल्ला प्रशासन कार्यालय काभ्रेपलाञ्चोकले कार्यालयमा सेवाग्राहीको भीड लाग्न थालेको भन्दै आलोपालो सिस्टम लागू गरेपछि अव सेवा लिन पालो कुर्नु पर्ने भएको छ । प्रशासनले सूचना जारी गरेर आउँदो बिहीबारदेखि सेवाको तालिका हेरफेर गरेको छ ।
कार्यालयले सूचनामार्फत सार्वजनिक अपिल गर्दै कोभिड–१९ को नयाँ भेरियन्टको जोखिमलाई मध्यनजर गर्दै स्वास्थ्य मापदण्ड अपनाइ सेवा लिनसमेत आग्रह गरेको छ ।
दैनिकरूपमा नागरिकतालगायतका सेवा लिन आउनेको सङ्ख्या बढिरहेकाले भीड कम गर्न समयतालिका हेरफेर गरिएको प्रमुख जिल्ला अधिकारी शिवराम पोखरेलले बताएका छन् । उनका अनुसार अर्को व्यवस्था नभएसम्मका लागि धुलिखेल नगरपालिका, मण्डनदेउपुर नगर तथा चौँरीदेउराली गाउँपालिका र तेमाल गाउँपालिकाका सेवाग्राहीका लागि आइतबार र बुधबार सेवा प्रदान गरिनेछ ।
यस्तै पनौती नगर, पाँचखाल नगर तथा भुम्लु गाउँपालिका र रोशी गाउँपालिकाका लागि सोमबार र विहीबार सेवा प्रदान हुने जारी सूचनामा जनाइएको छ । बनेपा नगर, नमोबुद्ध नगर तथा बेथानचोक गाउँपालिकाका लागि मङ्गलबार र शुक्रबार तोकिएको छ । अन्य दुई महाभारत र खानीखोला गाउँपालिकाका लागि दैनिकरूपमै सेवा प्रदान हुने प्रजिअ पोखरेलले जानकारी दिए ।
कार्यालयले गत असोज महिनायता जिल्लाभित्र अनिश्चितकालीन ‘स्मार्ट लकडाउन’ थप्दै आएको थियो । जिल्लास्थित कोभिड–१९ सङ्क्रमण नियन्त्रण, रोकथाम र उपचारसम्बन्धी केन्द्र (डिसीसीएमसी)ले समुदायमा सङ्क्रमणदर घटेको तथा मृत्युदर शून्यमा झरेका कारण काभ्रेपलाञ्चोक ‘एल्लो–जोन’मा परेकाले स्मार्ट लकडाउन केही खुकुलो पार्दै निषेधाज्ञालाई थपिएको जनाएको थियो । कोरोना सङ्क्रमणको दोस्रो लहर सुरु भएपछि गत वैशाख २० गतेदेखि जिल्लामा निषेधाज्ञा जारी गरिएको थियो ।
यसैबीच काभ्रेपलाञ्चोकमा कोरोना सङ्क्रमणको जोखिम न्यून रहेको पाइएको छ । केन्द्रका अनुसार हाल जिल्लामा ३२ कोरोना सक्रिय सङ्क्रमित छन् । केन्द्रले केही दिनदेखि नयाँ सङ्क्रमित नदेखिएको जनाएको छ । जिल्लाका सात स्थानीय तह मण्डनदेउपुर नगर तथा छ गाउँपालिका चौँरीदेउराली, रोशी, तेमाल, बेथानचोक, महाभारत र खानीखोला कोरोना सङ्क्रमणमुक्त छन् ।
जिल्लामा हाल सक्रिय सङ्क्रमितमध्ये बनेपा नगरमा नौ, पाँचखालमा तीन, धुलिखेलमा आठ, पनौतीमा सात, नमोबुद्ध नगरमा दुई र भुम्लु गाउँपालिकामा तीन रहेको केन्द्रले जनाएको छ । जिल्लामा हालसम्म १४ हजार ८ सय ४० मा सङ्क्रमण देखिएकामा १ सय ९३ जनाको मृत्यु भएको छ । हालसम्मका कूल सङ्क्रमितमध्ये ९८ दशमलव ४८ प्रतिशत अर्थात् १४ हजार ६ सय १५ सङ्क्रमणमुक्त भएका छन् ।

 

प्रकाशित मिति : १३ पुस २०७८, मंगलबार  ८ : ०५ बजे