काठमाडौं महानगरले बनायो सार्वजनिक शौचालयको लोगो

२३ जेठ ०७९, काठमाडौं । काठमाडौं महानगरले सबै ठाँउमा सार्वजनिक शौचालय चिन्न एक रुपता कायम लोगो बनाएर सार्वजनिक गरेको छ ।
लोगो सार्वजनिक गरेसँगै आफूसँग भएको शौचालय सार्वजनिक बनाउन चाहनेले महानगरमा सम्पर्क राख्नु पर्ने समेत सूचित गरिएको छ ।

काठमाडौँ महानगरपालिकाले सार्वजनिक शौचालय पहिचानका लागि नीलो पृष्ठभूमिको संकेत चिन्ह तयार पारेको हो । सर्वसाधारण प्रयोगकर्तालाई सार्वजनिक शौचालय चिन्न सजिलो होस् र सबै सार्वजनिक शौचालयको पहिचान एउटै होस् भनेर संकेत चिन्ह तयार पारिएको बताएको छ ।

गोलो रेखाभित्र नीलो पृष्ठभूमि, त्यसको माथिल्लो भागमा नेपाली भाषामा सेतो अक्षरले ‘सार्वजनिक शौचालय’ लेखिएको छ । बिच भागमा सेतो रङ्मै महिला र पुरुषको चिन्ह रहेको छ । शौचालयको तल अंग्रेजी अक्षरमा ‘पब्लिक ट्वाइलेट’ लेखिएको छ ।

महानगर क्षेत्रभित्रका होटल, रेष्टुरेन्ट, बैङ्क, व्यापारिक भवन, कम्पनी, फर्म, गैर सरकारी संघ संस्थाका शौचालयलाई सार्वजनिक बनाउन इच्छुकहरुलाई महानगरको सार्वजनिक निजी साझेदारी एकाईमा सम्पर्क राख्न सार्वजनिक आव्हान गरिएको छ ।