‘बितेको एक वर्ष सिकाईको उर्बर समयको रुपमा लिएको छु’

काठमाडौं, २२ फागुन । अभिनेता पल शाह (पूर्णविक्रम शाह)ले सिकाई जीवनभर अनवरत चलिरहने प्रक्रिया रहेको भन्दै बितेको एक वर्षलाई मैले सिकाईको उर्बर समयको रुपमा लिएको बताएका छन् ।
उनले सोमबार सामाजिक सञ्जालमा फेसबुकमा भनेका छन्, ‘मनमा न कसैप्रति रिस बाँकी छ न त कुनै प्रतिशोधको भावना। छ त केबल आफ्नो कर्मलाई तिखार्ने र दर्शकको अपेक्षालाई पुरा गर्ने एउटै लक्ष्य।
साथै मेरो बितेको एक बर्षको त्यो घटनासंग जोडीएका सम्पूर्ण ब्यक्तित्वहरुमा मेरो सदा सम्मान र सद्भाभ। र यहाँ कोही कसैको दोष नभएर समयको दोष थियो त्यसैले मेरो अनुरोध, कसैलाई गाली गलौच र नराम्रो व्यवहार नगरिदिनुहोला । उहाँहरुसँग फेरि सहकार्य गर्ने वातावरण मिलोस् । त्यसैले सम्मानित अदालतको निर्णयलाई सम्मान गर्दै म फेरि पुरानै संघर्षशील दैनिकीमा फर्किएको छु । मेरो स्वागतमा परिवार, आफन्त, साथीभाई मात्र होइन हजारौं दर्शकको भिड देख्दा म मात्तिएको छैन । बरु यो शुभेच्छाले मलाई थप जिम्मेवार बनाएको छ।त्यसैले सम्पूर्ण भगवान रुपी प्रिय शुभेच्छुकहरुलाई मनदेखि आभार प्रकट गर्दछु।