चलचित्र ‘बगान’ को कमाइ १० दिनसम्म ७० लाख

८ साउन । फिल्म ‘बगान’का निर्माताले कमाइ सार्वजनिक गरेका छन् । फिल्मले प्रदर्शनको १० दिनसम्म ७० लाख रुपैयाँ ग्रस हाराहारीमा कमाइ गरेको जनाइएको छ ।

सरोज खनालको डेब्यु निर्देशन रहेको यो फिल्म गत असार २९ गते देशव्यापी प्रदर्शनमा आएको थियो । निर्माता सुरेश वाग्लेले वितरक कम्पनीले उपलब्ध गराएको व्यापारिक आँकडाअनुसार कलेक्सन रिपोर्ट सार्वजनिक गरिएको बताए ।

एकल आमाहरूले देशको जुनसुकै हलमा पनि यो फिल्म हेर्न पैसा तिर्नु नपर्ने व्यवस्था गरिएको छ । फिल्ममा खनालसहित करिश्मा मानन्धर, आकाश श्रेष्ठ, प्रमिला कार्की, नीर शाह, बसुन्धरा भुसाल र मिथिला शर्माको अभिनय छ । स्वप्निल नीरवको कथामा आधारित रही बनेको यो फिल्म नेपाली वेबसाइट डटकमको प्रस्तुतिमा बनेको हो । ‘बगान’का निर्माता सुरेश वाग्ले हुन् भने कार्यकारी निर्माता विनोद मानन्धर हुन् ।