‘पशुपति प्रसाद २ः भष्मे डन’को फस्टलुक सार्वजनिक

१ भदौ । दशैंमा रिलिज हुन लागेको नेपाल चलचित्र ‘पशुपति प्रसाद २ः भष्मे डन’को फस्टलुक सार्वजनिक गरिएको छ । निर्माणपक्षले शुक्रबारबाट प्रचारको सुरुवात गरेको छ । कार्तिकको ४ गतेबाट रिलिज हुन लागेको फिल्मको फस्टलुकले दर्शकमा फिल्मप्रतिको चासो अझै बढाउने देखिएको छ ।
सार्वजनिक २ पोष्टरमध्ये एक पोष्टरमा फिल्मको शिर्ष भूमिकामा देखिएका नायक विपिन कार्कीलाई प्रस्तुत गरिएको छ । अर्को पोष्टरमा विपिनको साथमा नायक सौगात मल्ल, नायिका स्वस्तिमा खड्का, माओत्से गुरुङ, रविन्द्र सिंह बानियाँ, प्रकाश घिमिरे, लोकेन्द्र लेखक, सजन थापा मगर, प्रकाश दाहाल, विभू पौडेल लगायतलाई स्थान दिइएको छ । फिल्मका हरेक पात्रहरुको गेटअपले उत्सुकता बढाएको छ । खगेन्द्र लामिछानेको लेखन तथा निर्माणमा तयार भएको फिल्मलाई दीपेन्द्र के खनालले निर्देशन गरेका हुन् । फिल्ममा निरज कँडेलको डीओपी, कृष्ण बहादुर थापाको सम्पादन, बनिष शाहको सम्पादन, कृष्ण भारद्धाज र किरण भुषालको संगीत, प्रविण सिंहको नृत्य निर्देशन, शंकर पाण्डेको प्रोडक्शन डिजाइनिङ छ ।