पाटन (ललितपुर)
१५ चैत । ललितपुरको जावलाखेलस्थित खेलकुद मैदानमा फेरि व्यापारीहरुले मेला सञ्चालन गर्ने भएपछि खेल अभ्यासमा खेलाडीहरुलाई अवरोध हुने भएको छ ।
चैत २२ देखि २६ गतेसम्म ललितपुर चेम्बर अफ कमर्सको आयोजनामा जावलाखेलमा पाँचदिने ललितपुर इन्टरनेशनल ट्रेड एक्सो हुने भएको हो ।
नेपाली उत्पादनलाई अन्तर्राष्ट्रियस्तरमा बजारीकरण गर्ने भन्दै ‘मेड इन नेपाल’को नारा दिएर मेला हुँदैछ ।
जावालाखेल युथ क्वलले व्यवस्थापन गर्दै आएको यस चौरमा मेला आयोजना गर्न क्लव र नगरपालिकालाई कर बुझाउनु पर्छ ।
एक खेलाडीले नाम नबताउने शर्तमा फुटवल ग्राउण्डमा पटक पटक मेला आयोजना गर्दा नियमित अभ्यासमा अवरोध हुने गुनासो गरे ।
यसअघि यस फुलवल मैदानमा जुत्तामेला, च्याउ एक्सो र पुष्पमेला भइसकेको छ । फुलवल मैदानलाई व्यापारीकरण गर्न खोजिएको भन्दै सरोकारवालाहरु समेत असन्तुष्ट रहेको बुझिएको छ ।
अन्तर्राष्ट्रियस्तरको ट्रेड एक्सपो गर्न लागिएको ललितपुर चेम्बर अफ कमर्सका अध्यक्ष पुष्परत्न शाक्यले जानकारी दिदै इभेन्ट कम्पनीमार्फत मेला गर्न लागिएको भन्दै थप जानकारी नभएको ललितखबरसँग बताए ।
अध्यक्ष शाक्यले एक्स्पोमा नेपाल, भारत, पाकिस्तान, श्रीलङ्का, बङ्गलादेश, थाइल्याण्ड, टर्की, मलेसिया, साउथ कोरियालगायतका देशमा उत्पादित विविध वस्तु तथा सामग्री, मौलिक उत्पादन र सेवासम्बन्धी सामानको प्रदर्शनी हुने बताए ।
करिब रु ६० लाख खर्च लाग्ने अनुमान गरिएको सो एक्सपोलाई ललितपुर महानगरपालिकाले रु १० लाख उपलब्ध गराएको अध्यक्ष शाक्यले जानकारी दिए
एक्सपोमा महालक्ष्मी नगरपालिका र गोदावरी नगरपालिकाका उद्यमी व्यवसायीले पनि आफ्नो उत्पादनलाई प्रदर्शनी गर्नसक्ने गरी व्यवस्थापन गरिएको उनले जानकारी दिए ।
महानगरपालिकाको उद्योग तथा पर्यटन समितिका संयोजक तथा वडा नं ५ का अध्यक्ष विकासमान श्रेष्ठले यस एक्स्पोले सार्क राष्ट्रबीचको कला, संस्कृति र रितीरिवाज आदानप्रदान गर्न महत्त्वपूर्ण भूमिका खेल्ने बताए । उनले यस एक्स्पोले ललितपुरका साथै नेपालको आर्थिक गतिविधिलाई चलायमान बनाउन सहयोग पुर्याउने विश्वास व्यक्त गरे ।
प्रतिक्रिया