‘नेपहप श्रीपेच २’ मा बालेन शाह निर्णायकको रुपमा नरहने

ललितखबर
११ जेठ । र्याप गीतको रियालिटी शो ‘नेपहप श्रीपेच २’ को दोश्रो सिजनको निर्णायकको रुपमा र्यापर गायक तथा काठमाडौं महानगरका मेयर बालेन शाह नरहने भएका छन् ।
र्याप गायक बालेन शाह नदेखिने भएका हुन् । राजधनीमा शुक्रबार आयोजित पत्रकार सम्मेलनमा छिट्टै शो प्रशारण गरिने रियालिटी शोका निर्देशक निकेश खड्काले जानकारी दिए । असारको अन्तिम साताबाट शो प्रशारण हुने भएको छ ।
अघिल्लो शोमा मानस घले,गिरिस खतिवडा र बालेन शाह निर्णाक रहेकोमा यस सिजनमा बालेनको सट्टा महेश तामाङ दोङ निर्णायकको रुपमा भित्रिएका छन् । दोश्रो सिजनमा गिरिस र मानस निर्णायकमा निरन्तरता दिने भएका छन् ।
काठमाडौका मेयर समेत रहेका बालेन भने केही एपिसोडमा पाहुनाको रुपमा सहभागी हुने निर्माता सुदिप पोख्रेलले बताए । उनले काठमाडौं महानगरको मेयरको जिम्मेवारी लिइरहेका मेयर बालेन कार्यक्रममा सहभागी हुन सम्भव नहुने बताए ।
त्यस्तै कार्यक्रम सञ्चालकको रूपमा सुज्ता श्रेष्ठले नै निरन्तरता पाउने छिन् । दामी मिडियाको प्रस्तुति रहेको ‘नेपहपको श्रीपेच –२’को कन्सेप्ट तथा डिजाइन सुदिप पोखरेलले गरेका हुन् भने निर्देशकमा निकेश खड्का रहने तय भएको छ ।
‘नेपहपको श्रीपेच’को पहिलो संस्करण लगभग २ वर्ष पहिले सम्पन्न भएको थियो । पहिलो सिजनको विजेताका रूपमा भाईबर साइमनले बाजी मारेका थिए भने सह–विजेताका रूपमा जेनिश क्षेत्रीले आफ्नो नाम लेखाएर दुबई, अस्ट्रेलिया साथै नेपालको विभिन्न ठाउँमा आफ्नो प्रस्तुति दिई सकेका छन् ।
‘नेपहपको श्रीपेच २’को विजेताले रु १० लाख नगद, वर्ल्ड टुरको अवसर एवम् विभिन्न ब्रान्ड इन्ड्रोसमेन्टहरू प्राप्त गर्नेछन् साथै उपबिजेताले नगद रु ५ लाख साथै विदेशमा प्रस्तुतिको अवसर प्राप्त गर्नेछन् ।
भने ब्रोड्कास्टिङ्ग पार्टनरको रूपमा टेलिभिजनतर्फ कान्तिपुर टेलिभिजन तथा डिजिटलतर्फ ओएसआर रियालिटी रहेको छ । कार्यक्रम असारको अन्तिम साताबाट टेलिभिजनमा प्रसारण गरिनेछ ।
शोको डिजिटल अडिसन पनि खोलिएको छ ।