चलचित्र ‘सोल्टिनी’मा प्रकाश सपुतदेखि रविन्द्र झासम्मको लाइनअप

चलचित्रमा कलाकारहरु विल्सन विक्रम राई तथा अभिनेत्री परीक्षा लिम्बु,रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल र सुजन खतिवडा लगायतका अनुभवी कलाकारहरू अनुबन्धित

काठमाडौं
निर्माणाधिन नेपाली चलचित्र ‘सोल्टिनी’मा पछिल्लो पुस्तामा चर्चा कमाइरहेका गायक तथा अभिनेता प्रकाश सपूतदेखि अडिसनमार्फत छनौट भएकी सब्बु गुरुङसम्मको लाइनअप सार्वजनिक गरिएको छ ।

निर्माणपक्षले कलाकारहरु विल्सन विक्रम राई तथा अभिनेत्री परीक्षा लिम्बु,रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल र सुजन खतिवडा लगायतका अनुभवी कलाकारहरू अनुबन्धित गराएका जानकारी दिएको छ ।

चलचित्रमा नेपाली चलचित्र क्षेत्रका चर्चित कलाकारहरूको बाक्लो उपस्थिति रहने सोल्टिनीमा प्रकाश सपूतले ’भीमसेन पोखरेल’ र परीक्षा लिम्बुले ’दिलासा राई’को मुख्य भूमिका निभाउने चलचित्रको घोषणामा गरिएको छ । पहिलो पटक एकसाथ देखिन लागेका यी दुई कलाकारको जोडीले पर्दामा जादु चलाउने विश्वास गरिएको छ ।

भोजपुरको रमणीय प्राकृतिक सौन्दर्यमा छायाङ्कन हुने यस चलचित्रले समाजमा व्याप्त अमानवीयता र जातीय भेदभावका विरुद्ध आवाज उठाउनेछ । साथै, दुई प्रमुख पात्रबीचको प्रेम कथा पनि यसको मुख्य आकर्षण रहनेछ ।

चलचित्रको सङ्गीत प्रशान्त सिवाकोटी र हर्कुलस बस्नेतले दिएका छन् भने छायाङ्कन सुशन प्रजापतिले गर्नेछन् । प्लानेट थ्री फिल्म्सको प्रस्तुति तथा नेपसिने र योलो इन्टरटेन्मेन्टको सहकार्यमा बन्न लागेको यो चलचित्रका निर्माताहरू रेजिना बिस्ट र संसार चौलागाईँ हुन् । ट्राइडेन्ट कन्सेप्टले पब्लिसिटी डिजाइन गर्नेछ भने आरआर फिल्मस् प्रा.लि.ले नेपाल र नेपसिनेले विदेश वितरण गर्नेछन् । डिजिटल अधिकार एआर डिजिटलले खरिद गरेको छ ।

पुस १५ बाट छायाङ्कन सुरु हुने चलचित्रलाई २०८२ सालको असोज ३ गते संविधान दिवसको दिन प्रर्दशन गर्ने लक्ष्य राखिएको छ ।