चलचित्र ‘जुना’को विरहको गीत ‘आमाको माँया’ सार्वजनिक

ललितखबर
यही माघ २५ गतेबाट देशभरका प्रर्दशन सुरु हुने चलचित्र ‘जुना’को विरहको गीत ‘आमाको माँया’ सार्वजनिक गरिएको छ ।
गीतको केन्द्रमा कलाकार अस्मिता ढकाल देखिन्छिन् । पराई घर पुगेपछि भोग्नु पर्ने कष्टपूर्ण अवस्था गीतमा चित्रण गरिएको छ ।
गोदावरी फिल्म प्रोडक्सन एण्ड रिसर्च प्रालिको व्यानरमा निर्माण भएको चलचित्र जीवन सेञ्चुरीले निर्देशन गरेका हुन् ।

गीतमा प्रमुख कलाकार अस्मिता ढकाल र कृष्णप्रसाद धिताल लगायतलाई प्रस्तुत गरिएको छ ।
चलचित्रमा अस्मिता ढकाल, कृष्णप्रसाद धिताल, देशभक्त खनाल, रश्मी भट्ट, कमल बोहोरा, अस्मिता बस्नेत र खगेन्द्र न्यौपानेको अभिनय छ।

निर्देशक सेञ्चुरीले फिल्मले ‘बाल विवाह सामाजिक अपराध हो। त्यसकारण यसलाई अन्त्य गरौं’ भन्ने नारा लिएको बताएका छन् । ‘‘जुनाः एक व्यथा’ एक ऐतिहासिक र विशिष्ट प्रकृतिको चलचित्र रहेको उनले बताएका छन् ।

चलचित्रले बाल विवाह तथा महिलाको मुद्धा बोकेको हुँदा नेपाल सरकारले सन् २०३० सम्ममा बाल विवाह अन्त्य गर्न लिएको लक्ष्यलाई सघाउने उनले बताए ।

पर्वतको सालिजा ओख्रेनीमा छायांकन गरिएको चलचित्रमा दीपकप्रसाद घिमिरेको लगानी छ। चलचित्रमा राजबहादुर सानेको कथा, बीबी अनुरागी र रमेश सेञ्चुरीको संगीत, जीवन सेञ्चुरी र भीमबहादुर पौडेलको शब्द, अञ्जु पन्त, पूर्णकला बिसी र यदुराई लकान्द्रीको स्वर र रामेश्वर हुमागाईंको डिओपी छ। फिल्मको वितरण एप्पल इन्टरटेनमेन्ट, रिच इन्टरटेनमेन्ट र एफडी कम्पनीले गर्नेछन्।

यो चलचित्रपूर्व राष्ट्रपति विद्यादेवी भण्डारी, राष्ट्रिय सभा र प्रतिनिधि सभाका सांसद, विज्ञ, लेखक, समालोचकलगायतलाई देखाइएको छ ।