चलचित्र ‘अञ्जिला’बारे भ्रम छरिएको भन्दै विज्ञप्ति सार्वजनिक

काठमाडौं
चलचित्र ‘अञ्जिला’बारे भ्रम छरिएको भन्दै विज्ञप्ति सार्वजनिक गरिएको छ ।
चलचित्रका निर्माता प्रेमकुमार श्रेष्ठ र निर्देशक मिलन चाम्सले विज्ञप्ती प्रकाशन गरेर अन्तर्राष्ट्रिय प्रदर्शनबारे सामाजिक सञ्जालमा भ्रामक सूचना फैलाइरहेका भन्दै असन्तुष्टि जनाएका हुन् ।
प्रेस विज्ञप्ति अनुसार, हालसम्म जापान, कोरिया, क्यानडा, र हङकङ बाहेक अन्य कुनै पनि देशको वितरण तथा प्रदर्शन अधिकार बिक्री गरिएको छैन । सामाजिक सञ्जालमा विश्वव्यापी रूपमा चलचित्र प्रर्दशन गर्न लागेको दाबी गरिरहेको पाइएको, जुन पूर्ण रूपमा भ्रामक र आधारहीन रहेको विज्ञप्तिमा उल्लेख छ ।
नेपाली चलचित्र ‘अञ्जिला’ले दोस्रो हप्तासम्म निरन्तर प्रर्दशन भइरहेको छ । चलचित्र हाल देशभरका १ सय ७० भन्दा बढी हलमा प्रर्दशन भइरहेको निर्माण पक्षले जानकारी दिएको छ ।
नेपाली महिला राष्ट्रिय फुटबल टोलीकी कप्तान तथा गोलकिपर एन्जिला तुम्बापो सुब्बाको जीवनमा आधारित चलचित्र ‘अञ्जिलाको शीर्ष भूमिकामा एन्जिला आफैले अभिनय गरेकी छिन् । चलचित्रमा माओत्से गुरुङ र दयाहाङ राईले एञ्जिलाका बुबाको भूमिका निर्वाह गरेका छन् भने सिर्जना सुब्बाले आमाको भूमिका निभाएकी छन् । सुमिन गुरुङले दाजुको भूमिका, सुनिल थापाले कोचको भूमिका निभाएका छन् । साथै, यसमा बुद्धि तामाङ, विजय बराल, मञ्जु श्रेष्ठ लगायतका कलाकारहरूको पनि अभिनय रहेको छ ।