चलचित्र ‘ऊनको स्वीटर’ हलहरुमा बिहानैदेखि हाउसफुल

कलाकारहरूले पनि उपत्यकाका विभिन्न हलहरूमा पुगेर दर्शकसँग भेटघाट गर्दै चलचित्र हेर्न आएकोमा धन्यवाद दिएका थिए

काठमाडौं
शुक्रवारदेखि देशभरका चलचित्र भवनहरुमा प्रदर्शन सुरु भएको चलचित्र ‘ऊनको स्वीटर’ले आक्रमक व्यापार सुरुआत गरेको छ ।

निर्माण पक्षले दिएको जानकारी अनुसार काठमाडौं उपत्यकादेखि पूर्व–पश्चिमका मल्टिप्लेक्सदेखि सिङ्गल स्क्रिन हलहरूसम्म अधिकांश शोमा उल्लेखनीय उपस्थिति देखिएको छ ।
चलचित्रको वितरकलाई उदृत गर्दै निर्माण पक्षले दिएको जानकारी अनुसार देशभरका धेरै हलहरुमा दर्शकहरुको उल्येख्य भीड थियो ।

शुक्रवार बिहानैदेखि सुरु भएको दर्शकको यो चाप राती अबेरसम्म कायम रहेको निर्माण पक्षको भनाई छ । कलाकारहरूले पनि उपत्यकाका विभिन्न हलहरूमा पुगेर दर्शकसँग भेटघाट गर्दै चलचित्र हेर्न आएकोमा धन्यवाद दिएका थिए ।

वितरक गोविन्द शाहीका अनुसार पहिलो दिन चलचित्र हेर्न दर्शक आएपछि देशभरका धेरै हलहरूले शनिवारका लागि शो सङ्ख्या बढाएका छन् । शनिवार बिहानैदेखि अधिकांश हलहरू हाउसफुल देखिएको र हालसम्म देशभरका ३ सय भन्दा बढी हलमा प्रदर्शन भइरहेको छ । देशभर करिव ३ सय ६० हल छन् भने करिव ५ सय ६० पर्दामा चलचित्र प्रर्दशन हुने अवस्था छ ।

दर्शकबाट अत्यन्त सकारात्मक प्रतिक्रिया पाइरहेको चलचित्र ‘ऊनको स्वीटर’लाई शुक्रवार र शनिवारको कलेक्सन एकैसाथ सार्वजनिक गरिने बताइएको छ ।

गतबुधबार राजधानीमा प्रिमियर शोमा सहभागीहरुको राम्रो प्रतिकृया पाएको चलचित्रमा सामाजिक विषयबस्तुसँगै प्रेमकथामा आधारित रहेको छ ।

नवीन चौहानले निर्देशन गरेको यस चलचित्र चलचित्रमा विपिन कार्की, मिरुना मगर, परीक्षा लिम्बु, एलेक्स पारस, विल्सन विक्रम राई, सुरज तमु, भावना खपाङ्गी मगर, सुनिल पोखरेललगायतको अभिनय छ ।

केही समयदेखि प्रचारसामाग्रीको रुपमा सार्वजनिक गरिएको गीत, ट्रेलर र टिजर दर्शकले मन पराएका थिए भने झुमा लिम्बुले गाएको काफ्ले गीतले बजार तताएको थियो ।