बल्छी धुर्बेले ‘गोबर गणेश’को निर्देशन गर्दै, आज शुभमुहूर्त सम्पन्न

टेलिचलचित्रमा ‘बल्छी धुर्बे’को नामले चिनिले मरिचमान श्रेष्ठले चलचित्र ‘गोबर गणेश’को निर्देशन गर्ने भएका छन् । राजधानीको म्हपी मन्दिरमा चलचित्रको शुभमुहूर्त गरिएको छ ।

निर्देशक मरिचमान श्रेष्ठ (बल्छी धुर्बे)को उपस्थितीमा क्यामेरा पूजा गर्दै केदार घिमिरे ’माग्ने बुढा’ले नरिवल फोडे भने कलाकार रवि गिरीले क्लयाप हानेर चलचित्रको शुभमुहूर्त गरिएको हो ।

चलचित्रको छायांकन पनि आजैबाट सुरु भएको छ । काठमाडौंबाट सुरु भएको चलचित्रको छयांकन पोखरालगायतका स्थानमा हुनेछ ।

करिब ३५ दिनको छायांकन सेड्युल रहेको निर्देशक श्रेष्ठले जानकारी दिए ।

“हाम्रो कला र शिपले भ्याए र जानेसम्म राम्रो काम गर्ने प्रयास गर्नेछौँ,” निर्देशक श्रेष्ठले भने ।

मरिचमान श्रेष्ठले निर्देशन गर्ने ‘गोबर गणेश’ माघ १ गतेबाट प्रर्दशनको तयारी रहेको छ । उनको यो पहिलो फिचर फिल्म निर्देशन हो ।
टेलिचलचित्र ‘मेरी बास्सै’बाट दर्शकमाझ लोकप्रिय बनेका उनी त्यसपछि आफैँ टेलिचलचित्र निर्देशनमा आएका थिए । उनका टेलिचलचित्र ‘हल्का रमाइलो’ र ‘जुठे’ दर्शकमाझ लोकप्रिय छन् ।

बल्छी धुर्बे फिल्मस्को प्रस्तुतिमा निर्माण हुन लागेको यो चलचित्रको अभिनेत्रीमा वर्षा सिवाकोटी छिन् ।
यस्तै अन्य कलाकारमा मरिचमान श्रेष्ठ, विनोद न्यौपाने, पदम तामाङ, विल्सन विक्रम राई, निर्मल शर्मा, लक्ष्मीनाथ तिमलसेना, राजु याक्छा, रामप्रसाद खनाल, सन्तोष बानिया, सन्दीप लामा, माओत्से गुरुङ, सीतादेवी तिमल्सिना र पुजन घिमिरे (पुकु)लगायत छन् ।