दक्षिण ललितपुरका युवानेता महतद्वारा स्वतन्त्र उम्मेदवारी घोषणा

ललितखबर
दक्षिण ललितपुरका युवा नेता सनोज महतले स्वतन्त्र उम्मेदवारी घोषणा गरेका छन् ।
विहीबार राजधानमिा पत्रकार सम्मेलनको आयोजना गरेर महतले आमगी फागुन २१ गते हुने प्रतिनिधि सभा सदस्यमा ललितपुर क्षेत्र नं. १ का लागि स्वतन्त्र रुपमा उम्मेदवारी दिने घोषणा गरेका हुन् ।
उनले उम्मेदवारीसँगै ललितपुरको निर्वाचन क्षेत्रको पुर्नसंरचना गर्न समेत माग गरेका छन् । उनले महानगरलाई क्षेत्र नं. १, काठक्षेत्र क्षेत्र नं. २ र दक्षिण ललितपुरलाई क्षेत्र नं. ३ बनाएको खण्डमा प्राथिकताको आधारमा विकाश गर्न सहज हुने धारणा राखेका छन् ।
घोषणासँगै महतले नौ बुँदे एजेण्डा सार्वजनिक गरेका हुन् । उनले भ्रष्टाचार नियन्त्रण, प्रत्यक्ष कार्यकारी राष्ट्रपति प्रणाली, सानो आकारको मन्त्रीमण्डल,संसादको संख्या कटौती,मुख्यमन्त्रीको प्रत्यक्ष निर्वाचन,स्थानीय निकायका जनप्रतिनिधि प्रदेशसभाको सदस्य हुने,गैरदलीय स्थानीय सरकार बनाउनु पर्ने धरणा राखेका छन् ।

युवा नेता महतले आफू लेले टिकाभैरव क्षेत्रको ढुंगा खानी बन्द गर्न नहुने तर्क गर्दै राज्यले कानूनी दायरामा ल्याएर सञ्चालन गर्न आवश्यक रहेको बताए । ‘राज्यले संचालन पनि गर्न अप्ठ्यारो पार्ने र कानूनी दायरामा पनि नल्याउने अवस्था छ । त्यो अन्त्य हुनुपर्छ’ उनले भने । यहाँको नेवारी बस्ती मास्न नहुने र खोला किनारका खाली ठाँउबाट कोरिडोर खोलेर विकासको पुर्वाधार निर्माण गर्ने उनले योजना अघि सारेका छन् ।
युवा नेता केही बर्ष अघि माओवादी राजनीतिमा सक्रिय थिए । पछिल्लो समय वावुराम भट्टराई नेतृत्वको नयाँ शक्तिको ललितपुर संयोजकको रुपमा काम गरेको उनीसँग अनुभव छ ।