चलचित्र ‘गौँथली’ ५१औँ दिनको यात्रातर्फ

काठमाडौं

चलचित्र ‘गौँथली’ ५१औँ दिनको यात्रातर्फ अघि बढेको छ ।

चौथो हप्तासम्म निरन्तर प्रर्दशन हुन सफल यस चलचित्रले १९ करोड ग्रसकलेक्सन गरिसकेको छ, यो आकडा अनुसार यो वर्षको हालसम्मको सबैभन्दा धेरै कमाउने चलचित्र हो । प्रदर्शनको तेस्रो हप्तामा प्रवेश गर्दा १९ करोडको आकडा पार गरिसकेको छ । आज (शनिबार) पनि अधिकांश शो हाउसफूल प्रायः छ ।

‘प्रर्दशन भइरहेको ‘स्पाइडर म्यान’को शो कम हुँदै जाँदा ‘गौँथली’को शो थपिँदै जानु र नयाँ प्रर्दशन भएका सिनेमामा भन्दा दर्शकको रोजाइ यसमा देखिनुले यसले ५१औँ दिनको यात्रा तय गर्ने लगबत निश्चित जस्तै देखिएको छ ।

“हलमा आएपछि सिनेमा हाम्रो रहँदैन, दर्शकको हुन्छ । दर्शकले मन पराइदिइरहनु भएको छ । आफूले हेरेपछि आफ्ना आफन्त र छिमेकीलाई हेरिदिनुस् भनेर भनिरहनु भएको छ,” निर्देशक कपिल रिजाल भन्छन्, “अहिलेसम्मको माया र प्रतिक्रिया हेर्दा ५१ औँ दिनको सेलिब्रेसन ‘गौँथली’ले गर्छ भन्ने लागेको छ ।”

वर्ड अफ माउथ राम्रो हुँदा सिनेमाले अफ डेमा समेत हाउसफूल अकुपेन्सीमा व्यापार गरिरहेको छ । महिलाहरू हलमा बढी देखिएका छन् ।

साउन १ गतेदेखि प्रदर्शनमा आएको चलचित्र ‘गौँथली’मा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना, लक्ष्मीनाथ तिमिल्सिनालगायतका कलाकारहरूको अभिनय रहेको छ । बाल कलाकारका रूपमा अंशु ओली र प्रिन्स नेपालीले अभिनय गरेका छन् ।

डा. भोला रिजालको कथा रहेको चलचित्रको पटकथा तथा संवाद लेखनमा निर्देशक डा। कपिलसँगै निश्चल कुँवर, निरज नेपाल र गिरिराज घिमिरेले सहकार्य गरेका छन् ।

भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको यस चलचित्रको कार्यकारी निर्माता सरला रिजाल छिन् । निर्माताको रूपमा सुमन गिरी र डा। कपिल रिजाल छन् भने इन्दु गिरी, मनिष रिजाल, प्रलय रिजाल र जीवन ओली सह–निर्माताको रूपमा रहेका छन् ।

घर, परिवार, सम्बन्ध र आत्मीयताको भावलाई केन्द्रमा राखिएको फिल्मको वितरण रिच इन्टरटेनमेन्ट, एप्पल इन्टरटेनमेन्ट र एफडी कम्पनीले गरेका छन् ।

वि.सं. २०५७ सालमा रिलिज भएको चलचित्र ‘गौँथली’ले प्रदर्शनको ५१औँ दिन मनाएको थियो । तत्कालीन माओवादीले सिनेमा हल बन्द गराइरहेको बेला कठमाडौंमा भने यो सिनेमा लामो समय चल्न सकेको थिएन ।

तर, काठमाडौंबाहिरका दाङलगायत तीनवटा स्टेशनमा भने यसले ५१ औँ दिन मनाउन सफल भएको थियो । ५१ औँ दिनको सफलता मनाएको यो सिनेको पहिलो म्युजिकल सिनेमा थियो ।

त्यसकै अपडेटेड भर्सनमा रुपमा २६ वर्षपछि फेरि ‘गौँथली’ बन्यो । डा। भोला रिजालकै कथामा उनका छोरा डा। कपिल रिजालले निर्देशन गरे । ‘ह्यारी कि प्यारी’ पछि उनको यो दोस्रो निर्देशकीय चलचित्र थियो ।