तीन महिनामा विपद्‍बाट २२५ जनाको निधन हुँदा ४९ बेपत्ता

३० भदौ । यस वर्ष मनसुन सुरु भएयता विपद्‍मा परी २२५ जनाले ज्यान गुमाएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार २०८१ जेठ २८ गते नेपालमा मनसुन भित्रिएकोमा त्यस यता विपद्‍जन्य घटनामा परी २२५ जनाको ज्यान गएको हो । यो अवधिमा ४९ जना बेपत्ता रहेको र २८४ जना घाइते भएको प्राधिकरणको तथ्यांकले देखाएको छ । मनसुनजन्य विपद्‍बाट ४ हजार ६१५ परीवार प्रभावित बनेका छन् ।

गतवर्ष यसै अवधिमा ८५ जनाको मृत्यु, २९ जना बेपत्ता भएका थिए भने १२६ जना घाइते भएका थिए। गतवर्ष विपद् प्रभावित परिवारको संख्या ६ हजार ३० रहेको थियो ।

मनसुनजन्य विपद्ले सबैभन्दा धेरै बागमती प्रदेशमा ५७ जनाको मृत्यु र सबैभन्दा कम मधेस प्रदेशमा ५ जनाको मृत्यु भएको प्राधिकरणले जनाएको छ । मनसुनजन्य विपद्मध्ये सबैभन्दा धेरै पहिरोबाट १३५ जनाको मृत्यु भएको छ ।

असार २८ गते चितवनको भरतपुर महानगरपालिकाको सिमलतालमा गेग्य्रान बहाबमा परी दुई बसका ६२ जना यात्रु त्रिशुली नदीमा बेपत्ता भएका थिए । जसमध्ये २४ जनाको शव फेला परेको छ भने बससहित बाँकी यात्रु अझै हराइरहेका छन् ।

यसवर्ष कञ्चनपुरको दोधारा चाँदनीमा ऐतिहासिक वर्षा मापन भएको छ । सो स्थानमा सबैभन्दा धेरै ६२४ मिलिमिटर वर्षा भएको प्राधिकरणले जनाएको छ। यो ७७ वर्ष यताकै सबैभन्दा धेरै वर्षा हो ।