चिकित्सक आन्दोलित, देशभर आकस्मिकबाहेक सेवा ठप्प

काठमाडौं। उपभोक्ता अदालतले चिकित्सकीय लापरबाहीसम्बन्धी पछिल्ला फैसलाले नेपाल मेडिकल काउन्सिलको अधिकारमाथि हस्तक्षेप गरेको भन्दै नेपाल चिकित्सक संघले आज देशभर आकस्मिकबाहेकका सम्पूर्ण सेवा बन्द गरेको छ।

संघले यसअघि नै असार १७ गतेदेखि देशभरका चिकित्सक तथा स्वास्थ्यकर्मीलाई कालोपट्टी बाँधेर सेवा दिन आह्वान गरेको थियो। तर, अदालतको हस्तक्षेप जारी रहेको भन्दै आजको दिन आकस्मिक सेवा बाहेक सम्पूर्ण स्वास्थ्य सेवा रोकिने निर्णय गरिएको संघले जनाएको छ।

नेपाल चिकित्सक संघले कानुनी संशोधनमार्फत चिकित्सकीय लापरबाहीसम्बन्धी मुद्दा हेर्ने अधिकार केवल नेपाल मेडिकल काउन्सिलमै सीमित गरिनुपर्ने माग गर्दै आएको छ। संघले माग सम्बोधन नभए आन्दोलनका थप कडा कार्यक्रम ल्याउने चेतावनी पनि दिएको छ।

अदालतको पछिल्ला फैसलाले चर्कियो विवाद

केही साता यता उपभोक्ता अदालतले उपचारमा लापरवाहीको आरोपमा अस्पताल र चिकित्सकहरूलाई क्षतिपूर्ति तिराउने फैसलाहरू गर्दै आएको छ।

उपभोक्ता अदालतले हालै:

ओम अस्पताललाई ५० लाख ७० हजार रुपैयाँ,

हिमाल अस्पताल र संलग्न चिकित्सकहरूलाई १ करोड ४५ लाख रुपैयाँ,

ग्राण्डी सिटी अस्पताल र त्यसमा कार्यरत चिकित्सकहरूलाई ५७ लाख रुपैयाँ
बिरामीका परिवारलाई क्षतिपूर्ति दिनु पर्ने निर्णय गरेको थियो।

संघको आपत्ति

नेपाल चिकित्सक संघले यस्ता निर्णयले चिकित्सकीय अभ्यास गर्ने वातावरण असुरक्षित बनाएको भन्दै आपत्ति जनाएको छ। संघको भनाइमा, उपचारमा हुने हरेक नकारात्मक परिणाम अनिवार्य लापरवाही हुने होइन, तर पछिल्ला फैसलाले चिकित्सकहरूलाई आपराधिक दृष्टिले हेरिएको अनुभूति भएको छ।

संघले चिकित्सा पेशालाई नियमन गर्ने संवैधानिक निकाय नेपाल मेडिकल काउन्सिलको अधिकारमाथि अदालतले हस्तक्षेप गर्नु संविधान र चिकित्सा पेशाको मर्यादाविपरीत भएको दाबी गर्दै मुद्दा चिकित्सा क्षेत्रमै सीमित गर्नुपर्नेमा जोड दिएको छ।