२२ पुस ०७७, काठमाडौं । काठमाडौं, तार्केश्वर नगरपालिका ८ जरङ्खुमा ग्याँस पड्केर आगलागी भएको छ । यस स्थानमा डेरा गरी बस्ने नुवाकोट पञ्चकन्या गाउँपालिका २ घर भएका ३४ वर्षीय रामचन्द्र श्रेष्ठको कोठामा खाना पकाउने क्रममा ग्याँस पड्किदा मंगलबार साँझ आगलागी भएको हो । आगलागीमा परेर श्रेष्ठ र उनकी ६ वर्षीया छोरी रक्षा श्रेष्ठ घाईते भएकी छन् ।
घाईतेमध्ये रामचन्द्र श्रेष्ठलाई शिक्षण अस्पताल महाराजगंज हुँदै थप उपचारको लागि करुणा अस्पताल कपन रिफर गरिएको छ भने रक्षा श्रेष्ठको कान्तिबाल अस्पतालमा उपचार भइरहेको छ ।
साथीले छुरा प्रहार गर्दा मृत्यु
भारत मोतीहारी घर भएका २५ वर्षीय कलाम मियाको छुरा प्रहार गरी हत्या गरेको अभियोगमा त्यही ठाँउका २५ वर्षीय सुबोध शर्मालाई बुधबार बिहान प्रहरीले पक्राउ गरेको छ ।
काठमाडौं महानगरपालिका १६ बाईपास ओरालोस्थित सडकमा सुबोधले मंगलबार राति छुरा प्रहार गर्दा गम्भीर घाइते भएका कलामको शिक्षण अस्पताल महाराजगञ्जमा उपचारको क्रममा मृत्यु भएको हो ।
छुरा प्रहार गरी फरार रहेका सुबोधलाई काठमाडौं फर्पिङस्थित चेकपोष्टमा ना.१ ज ७५६२ नम्बरको सुमो गाडीमा प्रहरीले फेला पारी पक्राउ गरेको हो ।
यस सम्बन्धमा प्रहरीले आवश्यक अनुसन्धान गरिरहेको प्रहरीले जानकारी दिएको छ ।
अवैध लागूऔषध सहित पक्राउ
काठमाडौं, चन्द्रागिरी नगरपालिका ८ शितलबस्तीबाट मातातिर्थ घर भएका ३२ वर्षीय सुमन कार्की र सोही नगरपालिका ५ महादेबस्थान बस्ने १८ वर्षीय किशोरलाई नियन्त्रित लागूऔषध १ सय १९ ट्याबलेट नाईट्राभेट र २ थान मोबाईल सहित मंगलबार दिउँसो प्रहरीले पक्राउ गरेको छ । शंकास्पद रुपमा हिँडिरहेका उनीहरुलाई प्रहरीले जाँच गर्दा उक्त लागूऔषध फेला पारी प्रहरीले पक्राउ गरेको हो ।
ललितपुरमा प्रहरी अनावश्यक हैरानी दिने नियन्त्रणमा
महानगरीय प्रहरी परिसर ललितपुरको प्रहरी कन्ट्रोलमा फोन गरी अनावश्यक हैरानी दिएको अभियोगमा महालक्ष्मी नगरपालिका ४ कमल पोखरी बस्ने काभ्रे घर भएका ३८ वर्षीय राम कुमार श्रेष्ठलाई मंगलबार दिउँसो प्रहरीले नियन्त्रणमा लिएको छ ।
श्रेष्ठले प्रहरी कन्ट्रोलमा फोन गरी राति सम्ममा ठुलो क्राईम गर्छु अनि आफु नि मर्छु भनि अनावश्यक हैरानी दिएपश्चात तत्काल खटिएको प्रहरीले उनलाई नियन्त्रणमा लिएको हो ।
श्रेष्ठ उपर थप अनुसन्धान भइरहेको महानगरीय प्रहरी परिसर ललितपुरले जनाएको छ ।
ठिमीमा ट्रकको टक्करले स्कुटी चालकको मृत्यु
भक्तपुर मध्यपुर ठिमी नगरपालिका ३ गठ्ठाघरस्थित सडकमा लु.२ ख ६७८ नम्बरको ट्रकले बा.८२ प ९७३७ नम्बरको स्कुटरलाई मंगलबार दिउँसो ठक्कर दिँदा स्कुटर चालक सूर्यबिनायक नगरपालिका ४ दधिकोट बस्ने ५८ वर्षीय नरहरी न्यौपानेको मृत्यु भएको छ ।
ठक्करबाट गम्भीर घाईते भएका उनको नागरिक अस्पताल गठ्ठाघरमा उपचारको क्रममा मृत्यु भएको हो । ट्रक चालकलाई प्रहरीले नियन्त्रणमा लिएको छ ।
राजधानीको मिलनचोकमा चोरी
काठमाडौं महानगरपालिका ३१ मिलन चोक डेरा गरी बस्ने सोही महानगरपालिका शान्तिनगर घर भएका ३९ वर्षीय बिजय लामाको कोठाबाट कोही नभएको अवस्थामा कोठाको ताला फोडेर ५ तोला सुनका विभिन्न गहना र नगद ६ हजार रुपैयाँ गरेर करिब ४ लाख ९६ हजार रुपैयाँ बराबरको धनमाल मंगलबार दिउँसो चोरी भएको छ ।
चोरीमा संलग्न फरार व्यक्तिहरूको खोजी गर्नुका साथै यस सम्बन्धमा प्रहरीले थप अनुसन्धान गरिरहेको छ ।
प्रतिक्रिया